【隔牆對論】
16萬公僕加薪2.55%至3.92%加到一肚氣。紀律部隊代表退出薪酬調查機制，華員會、高級公務員協會考慮提出仲裁，各大工會與公務員事務局局長鄧國威全面反枱。高級公務員協會主席郭志德表示，加薪幅度沒正視民怨沸騰，公務員被市民「拍枱拍凳」、捱更抵夜的士氣問題；狠批鄧國威「百分百官僚」。公務員事務局前局長王永平則指公僕薪酬取自公帑，加薪幅度要令市民覺得公平合理。
記者：張文傑 雷子樂
記：《蘋果》記者
王：公務員事務局前局長王永平
今次的加薪幅度，不及2011年的7%和去年的平均約5%。但比起2009年凍薪，公僕的荷包算有着落。加薪的額外開支涉款57億元，當中公務員加薪約佔27億元，資助機構約佔30億元。
記：有人工加，為何多個公務員團體一致表達不滿？
王：我相信係個結果同佢哋期望有落差。經濟唔係差，失業率又低，咁點解個數相對係低呢？另一導火線係，三個警察協會高調宣佈退出薪酬趨勢調查委員會。咁喺工會政治嚟講，如果一個工會有強硬姿勢，話為咗會員利益要退出，其他工會一定骨牌效應，唔可以唔做多啲嘢。
細心啲分析，如果真係加得少，影響最大係最基層公務員。但你睇到最基層嘅第一標準薪級評議會職方代表相對溫和喎。其實佢哋擺出嚟個姿勢，同埋佢哋心中係咪真係好憤怒、好不滿呢？某個程度上，我今次都幾同情政府，因為佢真係冇錯，個機制都行咗咁多年。
薪酬調整機制實行了數十年，過去20年，曾有六次沒參考薪酬淨指標調薪，包括1992及1993年通脹達雙位數，故加幅低於通脹；2000年淨指標跌至負數，公務員凍薪。
記：警察也退出機制，是否在制度上真的出了問題？
王：公務員薪酬係政府、公務員同市民三方面嘅事。政策要素有兩點，第一，政府要畀足夠薪酬吸引、挽留、激勵公務員，應該比出面相對優厚；第二，薪酬要公務員、市民 都認為公平合理。公務員薪酬嚟自公帑喎，你唔能夠畀人印象，因為你自己人管自己人就冇咗個紀律。
工會有乜嘢不滿，點解要退出，佢哋要解釋喎。今年個調查，事前傾個調查方法、公司名單，大家都同意。出咗結果，先咁大反彈。如果你話個調查方法出咗問題，咁咪大家去修補囉。工會最終都要考慮一件事，你唔玩，唔承認機制，咁你憑乜嘢要求加薪呢？集體談判？大家鬥實力，你加唔足我就罷工？我唔認為市民會接受。咁仲有大半年時間，我又唔會悲觀，覺得關係全面破裂囉，咪慢慢傾囉。
記：有指近年較多公司以配股代加薪，但薪酬調查沒有反映。
王：係咪有咁嘅事呢？政府點解唔將成個薪酬調整機制公開？工會有乜嘢意見，咪列晒出嚟囉。講真，我冇見到一份工會文件，列明對今年薪酬趨勢調查有乜嘢不滿喎。如果我唔要呢個機制，要邊個呢？用統計處工資水平？跟通脹率再加1%？咁加幅再分唔分高、中、低層呢？我係諗唔到有乜嘢機制可代替，而又令公務員同市民都接受喎。唔好忘記，𠵱家公民社會意識強咗好多，你唔能夠好似以前咁樣，政府同公務員講掂數就掂啦，唔得㗎！你聽吓電台啲烽煙節目，市民一面倒認為公務員輸打贏要喎。
王永平任公務員事務局局長年代，曾處理立法減薪、工會對簿公堂等複雜議題，也未出現鄧國威的狼狽情況，連加薪也弄到要向工會「道歉」。
記：鄧國威被多個公會狠批，他有何不足？
王：某程度上，我同情佢。有時你講一句說話唔準備，俾人大造文章。但你睇返咁多年，係咪我哋大部份時間跟淨指標呀？早兩年，個淨指標到7%喎。有市民嘈，到最後，都係跟返個淨指標喎。當然，公務員事務局局長要同工會打交道。當年我做局長，公開講說話都好小心。我當年做減薪，從來唔會講「出面啲人工冇咁高，唔該你哋減下薪啦」，我永遠係講「合情合法合理」。佢一句說話，唔代表政策錯喎。如果你做法唔啱，講幾多動聽說話都係唔啱㗎。
記：是否現今的工會特別難搞？
王：工會係要為會員爭取福利，你點都要去應對。公開應對，你不能刺激公務員工會；私下，你可以放啲。以前我都試過中途離席，工會都試過拍枱離場。佢喺家退出咗（調薪機制），咁政府同公務員打交道，就係要去面對呢啲問題。政府最終都係尋求一個公道做法，說服工會。我當年做立法減薪，最初全部工會冇得傾。到咗第二次，吸收教訓，政府冇咁硬，工會都考慮社會反應，咪談判囉，咪「033」囉。
警察的職方組織，與處長曾偉雄一樣同屬「鷹派」，先是拒認薪酬調查結果，接着退出機制。督察協會主席曾昭科曾不諱言特首梁振英說好了的對公僕「聽、定、撐」承諾是否已拋諸腦後。
記：警察爭取獨立薪酬評估，是否可行？
王：警察已有獨立薪金表，一般係高過所有職系，已反映到佢工作嘅獨特性。佢哋有個警察評議會，由警務處長做主席，已經係與別不同。要一個獨立機制？我唔理解。警察都係公務員喎。公務員嘅薪酬調整，係要反映整體狀況，分高、中、低級（調薪），唔係反映個別部門狀況。咁消防員、飛行服務隊、AO都好獨特喎，你去邊度搵（類似行業比較）？咁咪要搞好多個獨立機制出嚟？
mailto:[email protected]
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange