馮仁昭四圍超:求愛男Vincent 寸無綫造假 - 馮仁昭

馮仁昭四圍超:
求愛男Vincent 寸無綫造假 - 馮仁昭

無綫前晚播出《求愛大作戰》第四集,38歲嘅獵頭公司高層Vincent因為衰口臭批評港女,力數盛男Thomas缺點,兼且彈爆港男冇長處,成為網友圍插新目標,令標榜係白馬王子嘅Vincent馬上淪為賤男,前晚嗰集Vincent力數Thomas:「佢怕醜,唔識𠱁女仔,點教點學都冇自信。」佢冇義氣出賣兄弟,結果被三位女助教評為最低分,要大懲罰,要喺鬧巿向女途人攞電話號碼,Vincent瘀爆食白果後,竧𣉢大嗌:「香港女仔好寸呀!」

超級自戀嘅Vincent喺facebook大晒赤膊自拍相。
互聯網圖片

英國長大嘅Vincent參加節目想試吓媾港女,但未媾到就嫌三嫌四,又睇唔起香港男仔。佢稍後會嘗試媾江西女律師Alice,不過最後食檸檬,Vincent又喺facebook自戀地貼咗張晒肌自拍相。

Vincent被大懲罰要當街問女仔攞電話。
電視圖片

盛男Thomas(中)俾Vincent彈爆佢冇自信又怕醜。
電視圖片

綠魔Karl騎呢上位,仲搶眼過身後路過嘅杜德偉。

「綠魔」搶贏杜德偉

Vincent沙塵自負惹觀眾討厭,但佢噚日同馮仁昭講:「節目內容唔係我自己諗法。」擺明寸無綫造假,並非真人騷,Vincent又話:「節目太正路冇人想睇,每個節目都要有奸角,我講有啲嘢畀無綫剪走咗。」叫佢評吓節目內容有幾成真,佢又口窒窒迴避。《求愛》編導岑應噚日就話:「我哋個節目從來冇安排角色扮演,Vincent鏡頭外喪鬧港女,下個禮拜會播出偷拍部份。」
另外,《求愛》形象導師、「綠魔」Karl,最愛以標奇立異嘅打扮出街,佢前日現身中環,身邊多咗肥妹助手同男化妝師,Karl由往日傍實𡃁模出騷變為排場十足,最搞笑係當杜德偉行過佢身後都冇人留意,俾Karl搶晒鏡。
撰文:馮仁昭

逢周五隨《蘋果日報》附送嘅時尚美容雜誌《add》雖然早已派完;
拎唔到書嘅朋友,可以上番《add》嘅官網 http://add.appledaily.com 睇番足本網上版,除咗有專訪外,仲有好多時裝靚嘢睇!

有料放?想收料?入嚟【蘋果互動】啦!
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange