無論哪個年代，返工放工，身心俱疲，最怕，遇上蘇波榮。So boring呀。
70年代生活沒那麼精采，一家人食飽飯睇電視睇吓今日講乜先，瞓醒又一天。人累，心裏倒是無慮。
40年過去，今日回家睇電視，隨時更波榮。今個六月，有盧海鵬詹瑞文的「奇幻Show」；又有阿燦與黎文卓，拖牛回歸的「香港幽默文化展」，還有陳淑莊的《講女烈傳貳之出得嚟環》、鄒凱光《齋呵唔鬧》。掃不掉身心勞累，都彷彿刻意讓這個六月，笑聲不斷。
記者：陳慧敏 攝影：陳盛臣、潘志恆、周旭文
盧海鵬：一路做一路學
今日，「柒字頭」的大抵都被盧海鵬試咪試大。睇《蝦仔爹哋》看他無厘頭爆肚；扮羅人《幾許瘋語》，扮撻成一塊《壽頭記》，唱到賣魚勝都識得劉以達。但鵬哥的歡樂師承何方？除了電影皇帝趙丹，仲有蘇聯《黑桃皇后》男主角斯特里仁諾夫（Oleg Strizhenov），來港後則最愛梁醒波、余明叔：「梁醒波演大戲同喜劇都一流，講嘢時每一個字配一個動作，例如：『我今晚同你去威，好嗎？』。」說時波叔上身，睩大本來犯睏的眼，每一隻字不是戚眼就是嗡鼻，將老夫子的表情演到臉上。
鵬哥的七十年代，香港人笑得簡單直接。到許冠文兄弟帶來新浪潮，找學生、書院生寫稿搞gag，最後來個妙語（punch line），是種喜劇幽默，鵬哥：「搞gag有好多種的。直接的，間接的。講嗰個唔笑，聽嗰個笑到碌地。70、80年代好流行。然後又到周星馳，他直接將個punch line講出來。」然而，擠眉弄眼這支歌仔今日已嫌趕客。要引人發笑，要求更多：「無論點幽默，你個人都要有好多墨水，在適當時候加到年代裏，才算幽默。做個喜劇演員不能做死一樣，我到今日都仍一路做一路學，要接近社會，大眾化，才有用。」
做壞人 好勞氣
盧海鵬當年在國內做綜藝節目的團長，甚麼都要做，但就練就周身刀。70年代來港，以超齡之姿加入藝員訓練班。《民間傳奇》年代，官仔骨骨的周潤發做官差、家丁；惡樣盧海鵬專做惡爺，或搶李香琴親的壞縣官：「做一場戲好勞氣的！」搶開有條路，像有陰謀的鄭子誠，個個導演都找他做壞人：「喂，定咗型，長期咁做好辛苦喎！我自己變好過喇。我做黑社會都可以奸得嚟好幽默、好好笑。後來導演看了，就把我轉到《歡樂今宵》。然後又人人以為我淨係識得做《歡樂今宵》。吖！畀個正經戲我做又唔敢喎！於是我又改（戲路），去到《暗花》（杜琪峯監製電影）先真正改到，讓人感到，我都可以演現實的戲。」捱了這麼多年，張張刀把把利都真係威㗎！
嘴藐藐 扮特首
多年來細緻的觀察，今日鵬哥隨時名人上身，我說我掛住你扮的肥姐小鳳姐，他發爛渣：「要有架生先扮得㗎！扮住梁振英先啦！」眼定定的是689：「各位……」；嘴震震是唐唐「你呃人！」三兩秒，我在鏡頭後忍笑扯哮。然而多年來最難忘，是偷胸圍扮肥姐：「冇人好似佢咁犀利嘅（身材）。公司服裝間都冇咁多準備。咪惟有趁阿肥唔喺度，同導演去佢屋企，𠱁個工人去攞小姐啲嘢出嚟，個工人梗係鬼殺咁嘈啦。我話一定會還先至攞到。點知返到去一着！（個胸圍）空蕩蕩，都唔啦更嘅！於是亂塞廁紙雜物入去，塞到頂住個胃，做完第二日個胃痛到乜嘢咁！着完高踭鞋仲腳抽筋㖭！我真係服咗啲女士。」
廖偉雄：過去不過係嚿屎
以笑去面對世界一切，是一種修為。
一講起阿燦，未必想起《網中人》的程燦，可能是核突歪嘴的乜太，或者高登金句王。與他話當年，準備笑到碌地，誰知：「我都冇巔峯過！也沒有慘過。人生一定有起有跌，個過程係咁，你諗嚟做乜？」回味吓囉。「過去不過係嚿屎。嚿屎都屙咗出嚟，不能改變，你仲諗嚟做乜？」金句王，願聞其詳。
所有嘢 都係藝術
演藝，其實是一面鏡，最重要是能反映時代。阿燦：「為何清明上河圖到今日都咁多人睇？因為畫裏每一個細節都記錄了那個時代發生的事情，藝術品才有流傳的價值。」在看了劉天賜的《編劇秘笈》後，發現自己想要的藝術不只這樣，於是退出演藝跑去做生意。雖然「衰咗」，卻擴闊了眼界，知道做人不僅如此：「雖然沒有十萬元一個月的收入，但好些人住的環境都比我們好，生活不比我們差，為甚麼？」
所有創作源自模仿，加上吸收、消化、再創作，超越前者變成自家，否則你只是臨摹家：「你有錢就會脫離生活，你有生活有遊艇，但你知唔知嗰個人排隊睇醫生時的慘況吖？知唔知佢住籠屋、四圍撲水供樓的慘況吖？其實所有嘢都係藝術，作為一個演藝工作者，你需要這些data。」重要的是深度。
就咁講 港人唔聽
十年前，阿燦在國內搞環保農莊，相信環保簡單的生活，才是我們的將來。為着首屆舉辦的「香港幽默文化展」，阿燦跟黎文卓合作，以兩隻「港牛」牛利叔跟牛媽跟，以漫畫形式同大家講環保，阿燦：「因為就咁講香港人唔會聽。」
「離開這麼久才發現，香港的生活太壓迫了。你叫他出來食飯，他們沒空；你話『喂！有嘢傾呀』，佢深夜兩點都會走出嚟。」現在阿燦住在廣州，二千呎的樓，兩邊窗南北對流，有露台，月租三千人民幣，管理費不過四百元，這樣的環境，廣州大把！阿燦：「新加坡共產黨的共產，70%是政府公司；香港就70%是商家佬的公司。你為了供樓將大部份收入放進去，沒了生活。你不兩公婆去工作，會死。我不明白為何香港會變成這樣。」他將他十年來看不慣，看不懂的事，盡情諷刺：「我阿燦，是絕對可以在歷史上留一筆的。今日電視台都要播我條片。到阿燦死咗，阿燦今日講的就是金句。」我抱住塊「笑星拍板」，腦裏千迴百轉。
許冠文 ：中國大陸在學我們
講港式幽默，你想起廖偉雄、周星馳、黃子華，但他們都叫我應該找許冠文。
許冠文：「70年代的笑料呀，很畫面，很動作，很表面化，扮女人呀、踩蕉皮仆親呀。差利是第一個拍短篇幽默小品的人，他釣魚釣隻鞋上來，意想不到，觀眾們已經笑到死。」當時他們幾兄弟受西方文化影響，在節目中混入許多英美動腦筋gag。
「7、80年代，電影界多好多港式幽默！全東南亞都在看我們的喜劇。如新藝城就做好多嘢，武打方面如成龍、洪金寶等動作搞笑，都好地道。」然而現在着重的，是視覺特技效果，「現在的punch line排得很急，以前分零鐘一個，現在半分鐘一個都怕太少了。內容深啲又冇人明、冇人睇。」特別是中港合作後，兩地文化語言不同，港式幽默越來越淡。許冠文：「其實現在中國大陸在學我們，如《人再囧途之泰囧》，都是簡單直接諷刺社會。看完不只要笑，還要笑中有淚。假以時日，可會融合出新的特色。」
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange