【隔牆對論】
記：《蘋果》記者
郭：高級公務員協會主席郭志德、屋宇署高級結構工程師
加薪幅度各有期望，紀律部隊評議會職方代表最初希望加薪幅度不少於7%，但薪酬趨勢指標結果是，高級公務員加薪幅度為2.55%、中、低級加3.92%。警隊三個員方組織及紀評會退出調薪機制、華員會和高級公務員工會尋求仲裁。行之有效的談判桌搖搖欲墜。
記：薪酬趨勢調查報告出籠之初，有否預計到會弄致如此田地？
郭：報告出嚟我哋覺得好詫異，同我哋睇到市場上嘅人力資源狀況唔脗合。大部份公司加薪幅度係4至4.5%。有追問有乜嘢因素令今年（淨指標）數據嚴重偏低，發現𠵱家個機制，公司係唔需要報非現金薪酬，咁係漏咗網。
記：但之前的調查也是如此？
郭：幾年前，某銀行用多年後發放嘅股票取代現金花紅。近兩年，呢類情況唔係咁恐怖，但今年原來已經蔓延得咁犀利，特別喺金融界別，非現金薪酬更加左右個數據。
行政長官會同行政會議考慮薪酬趨勢調查淨指標、經濟狀況、生活指數、政府財政、職方的申請、公務員士氣等「六大因素」去決定加幅。但工會認為，各項因素所佔比重的透明度不高。
記：今年調薪最不滿是甚麼？
郭：淨指標外仲有其他不滿，其他因素例如通脹，今年係唔低嘅，政府扭曲咗一啲嘢，佢話我哋要求嘅4.42%係一個預測（通脹）數字。唔係嘅，調查報告白字黑字寫出嚟，係12/13年度統計處甲類消費物價指數。仲有士氣問題，公務員真係太乖，默默耕耘，做到7點半、8點半。
另外因為民怨沸騰，啲人一上嚟見公務員就已經拍枱拍凳，同事好難做嘢，量同壓力都大。呢十幾年，政府都係冇實質上去維持同提高公務員士氣。怨氣、心生不忿留咗喺度，吓吓喺人工度打壓同事，人手亦配合唔到，一有問題搵人出嚟祭旗先，好少講啲好聽、激勵同事嘅說話。
記：有指因新政府弱勢，公務員今次趁機「發圍」？
郭：唔係，公務員好公道嘅，你好公道對佢，就乖乖做嘢，冇人係惡意地去令政府丟臉、同政府過唔去。
工會不滿加幅，公務員事務局局長鄧國威擺出戰鬥格，表示加薪幅度較低的高級公務員「承受能力較高」，又強調機制並非與通脹掛鈎。結果引起工會更大的不滿。
記：十年前立法減薪時不滿應更大，政府處理手法有何不同？今次衝突，與公務員事務局局長鄧國威的作風有關嗎？
郭：當年「033」（02年尾政府要公務員減薪6%，後來改為03年凍薪、04及05年各減3%）時，超級嚴重啦，本來減6%，大家都可以慢慢磨合一個方法，將對社會、公務員震盪分攤。
09年減薪，高評會都有提仲裁，曾特首話有按機制喎，拒絕咗。但當年佢自己帶頭同局長減5.38%，我哋覺得佢叫做真係有考慮過（公務員諗法）。今年特首（梁振英）真係冇出嚟講過嘢，我哋覺得鄧局長冇下情上達，甚至喺傷口上灑鹽，話乜嘢高級公務員承受能力高呀，承受能力唔係因素之一，咁下年話成個公務員團隊承受能力都高，唔使做調薪都得啦。
記：華員會指鄧國威很冷淡，對你們呢？
郭：客觀咁講，以前俞（宗怡）局長爽朗決斷好多，開會有問題即刻同你討論，甚至辯論，但大家好尊重佢。鄧局長性格比較冷一啲，好少現場即刻討論，好多時攞啲好官僚嘅說話耍咗你。如果今年係俞局長做呢，相信大家會有一啲接近啲嘅共識。𠵱家你睇到係百分百官僚。
記：你們是否輸打贏要？前年加薪（7%）高於通脹就不出聲？
郭：大家要明白，公務員都係打工仔，都希望個老闆畀一個滿意加薪，過得人過得自己，盡量唔想出嚟講啲嘢去起波浪，之前如果一切正常，唔使出嚟話係正常㗎，𠵱家係睇到一啲嘢唔對路，向老闆申訴，係打工仔自然反應。
記：公務員事務局前局長王永平批評你們的指控理據不足；他認為紀評會及警評會退出薪酬趨勢調查委員會後，下年商討薪酬會變成政治角力。
郭：王永平先生講乜嘢都得，我唔清楚佢係坐喺乜嘢位置度講，班同事只希望得到公平對待。有代表退出正正考驗政府危機處理，佢哋怨氣咁大，你去游說囉，我評論唔到。
記：你們除了想提出仲裁之外，會否上街？
郭：希望𠵱家機制有嘅嘢，試晒先，佢肯成立，對大家、對社會最好。如果特首用好荒謬理由去拒絕成立，而唔理機制穿咗窿，咁會員會有反應，到時睇囉。
mailto:[email protected]
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange