狼振英首次訪美，撞正前CIA叛諜斯諾登在港爆料，美國傳媒自然好關注，趁勢捉住到訪嘅狼振英攞料，點知堂堂香港特首，卻N次以一句「I have no comment on individual cases（不評論個別案件）」回應；無論記者點問，都係呢句答案，難怪有市民懷念林瑞麟，覺得狼英呢部人肉錄音機仲廢過林公公。
網民懷念林瑞麟
查實引唔引渡斯諾登返美國，狼英邊有say吖？但縱使冇say，都唔使乜嘢都唔答，仲要N度食帶咁repeat，搞到外國記者聽完都嘴藐藐，嘲笑這個特首太鵪鶉。唔少網民懷念上一代嘅人肉錄音機林瑞麟，就算唔評論，都會諗吓其他用字或方法遊花園，盡力做到講完等於冇講，「讚揚」林公公有heart過狼英囉！
可以想像，斯諾登都會對呢個「食帶」特首滴汗，唔知聽完會唔會覺得嚟錯香港？但肯定好多人都睇唔過眼狼英雙重標準。時事評論員潘小濤喺facebook諷刺狼英，指佢對斯諾登、問責落台、劏房、張震遠及六四等已經發生嘅大事一概唔評論，但對未發生嘅佔領中環，卻開腔話係「違法、犯法、必執法」，到底呢個係乜嘢邏輯呢？
mailto:[email protected]
【蘋果互動】有料放？想收料?入嚟啦？
蘋果互動，是蘋果日報與讀者緊密互動，放料及收料的聚腳地。
http://on.fb.me/14ZZe5m