NBA總決賽第4場會喺今朝上演，賽前場數落後1:2嘅熱火，主將勒邦占士喺第3戰進攻表現非常唔掂，外圍投射完全冇準；似乎「大帝」都知衰，喺周三操練就收起笑容，好認真咁猛練射波，仲將件練習衫掛喺條頸上面當披肩扮超人，唔通咁樣會飛得高啲？
自發加操係咁射
總決賽第3場，對占士嚟講可以話係恥辱一戰，全場21射7中，單計3秒區外嘅外圍投射，更加只係13射2中；熱火Big 3喺頭3場總決賽，冇一個曾經喺單場獨取到20分或以上。
熱火如果喺第4戰再輸，就會陷入玩完邊緣，占士當然知道喺呢個關鍵時刻，自己要做番場好戲；佢喺周三集訓嘅時候，就冇再同隊友嘻嘻哈哈，一臉認真加上眼神充滿殺氣，仲實牙實齒咁話：「第3場輸波令我成個世界都灰晒，對我嚟講更加係谷底中嘅谷底。所以我敢保證到第4場，班波會即刻反彈。」
大帝喺呢次操練嘅裝扮都好特別，將件熱火練習衫套上條頸度，好似將自己變身做超人咁。占士就係以咁嘅裝扮開始練習，不停咁射波，似乎要好好改善吓自己嘅外投。半個鐘之後，身水身汗嘅占士依然未夠皮，自己不停射同埋入樽，認真程度爆晒燈。
領先緊嘅馬刺備戰就輕鬆得多，教練普波域治加埋上仗功臣丹尼爾格連，仲出席關懷社區活動，同啲基層市民玩吓層層叠同大富翁；不過主將柏加據講大髀有傷，要到開波前先確定到可唔可以上陣。
另外，馬刺喺總決賽第3場大勝，但直播收視就唔多理想，美國ABC電視台錄得只有10點收視，係自07年嚟最低一次；07年最低紀錄又係有馬刺份，難怪有人話佢哋係悶波保證啦。（now635台今日9:00am直播總決賽第4場）
【蘋果互動】有料放？想收料?入嚟啦？
蘋果互動，是蘋果日報與讀者緊密互動，放料及收料的聚腳地。
http://on.fb.me/14ZZe5m