無綫最近黃金時段劇集收視唔多掂，好難得先有部《情越海岸線》突破3字頭收視缺口，難怪福將黃子華掛帥嘅新劇《My盛Lady》都要諗諗計，炮製多啲特別場口谷收視！日前陳敏之同阮兆祥就喺油麻地拍攝一場搞笑激咀戲，敏之今次收埋長腿，變身清純四眼小雲look，仲要喺32度高溫下吊威吔，都咪話唔慘。劇情講述四眼敏之跌咗銀包，竟然俾冤家祥仔執到，敏之一時心急喺樓梯滑倒，最後仲誇張到凌空飛起激咀祥仔。
「呢啲福利嚟」
拍攝當日天氣悶熱，敏之戲服下又要着打底衫，令佢勁難受，佢話：「同祥仔係鬥氣冤家，點知我跌銀包又俾佢執到，我仲仆親仆到飛埋去咀佢，希望有個喜劇效果啦。今日個造型係前期唔識打扮，所以冇自信又戴埋眼鏡，遲啲就會變身做靚女歌手。」拍攝前敏之又搞笑問祥仔：「你畀咗幾錢監製呀？我哋咀第幾次呀？」祥仔笑笑口話：「呢啲福利嚟呀！」
繼早前喺沙灘激咀敏之，再拍咀戲嘅祥仔仲獲伊人親手抹汗，恨死人！佢又笑笑口話：「今次已經係第三次拍咀戲喇，上次石澳沙灘一次，尖東又拍過一次，今次就油麻地，希望拍晒全港咁多區就好喇！不過每次咀都係錯摸，想帶喜劇效果畀大家啫。我哋會唔會演變做情侶就未知，因為監製仲保密緊，所以未知有冇收成。」
版主：陳基征
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！
【蘋果互動】有料放？想收料?入嚟啦？
蘋果互動，是蘋果日報與讀者緊密互動，放料及收料的聚腳地。
http://on.fb.me/14ZZe5m