Rubber duck告別香港，維港頓感冷清，有人從照片緬懷其英姿，也有人製作陶瓷duck哥，男男女女齊「造鴨」。中環有群上班一族，放工後跑上陶瓷製作室，將陶泥搓成老翻duck哥，追思之餘，也減輕工作壓力，彷彿將電影《人鬼情未了》經典拉杯一幕改為《人鴨情未了》：「Oh, my duck, my darling……」記者：中環特工隊
中環荷李活道行人電梯旁有間陶瓷工作室，學員來自中環不同階層，有外地來港當CEO的人妻，也有健身教練，還有人力資源顧問，甚至演藝明星，至於姓名則不好說。20多歲的Stephy從事電腦行業，一心為了鴨仔而來，她說：「我都幾鍾意隻rubber duck，佢嚟香港我都去咗幾次同佢影相，咁啱我又想整啲禮物畀同事，不如就整番個鴨仔畀佢哋啦。」泥鴨過江自身難保，這隻鴨千萬別去維港。
再問下去，才知Stephy對陶瓷全沒興趣，她的朋友兼陶藝導師Aidan見她喜愛rubber duck，便邀請她來造鴨。Stephy拿起陶泥，搓成鴨頭、鴨身和一對翼，那一刻感動如初為人母，「造隻鴨會好專心去造，唔使諗公司嘅嘢，個腦一片空白，工作乜嘢都唔會記得晒，專注做呢件rubber duck，整出嚟覺得好開心，成功感會比較大，有減壓嘅感覺」。
合作造鴨學習信任
另一名學員Brenda是獵頭公司顧問，她對工作與陶瓷要求一樣高，「我覺得工作同陶瓷都係同一個feel，造陶瓷唔使諗住公司啲嘢，當你造完一件作品嘅時候，會好有成功感、好開心」。不過，陶瓷始終比工作來得簡單，即使她製作的rubber duck跟正牌不同，也無人責難。
她跟任職健身教練的Brian聯手搓鴨，記者正想唱《Unchained Melody》，才發現二人只是陶藝拍檔，造隻貓造隻鴨不做情人。Brenda三句不離工作，滿口人力資源術語地解釋：「合作精神嘛，即係team work（團隊），大家信大家，如果你唔信你嘅team mate（隊員），好難有cooperation（合作）。」
大隻佬蘭花手搓泥
Brian架起一雙起𦟌的手瓜，配以蘭花手搓揉陶泥，都幾詭異，他向友人說起陶藝，人人想起《人鬼情未了》，覺得男人老狗學陶藝匪夷所思。Brian說：「其實學陶瓷冇乜原因，我學咗三年半，初初諗住玩吓，之後就鍾意咗。」記者覺得，陶瓷對他影響之大才是匪夷所思，他從眼前這團泥土，發現應該做自己喜歡的事，把心一橫辭去沉悶的會計工作，披上背心當健身教練。
Brian說：「陶瓷亦都可以洗淨心靈，譬如嗰日你好moody，你拉杯會發現拉極都拉唔到，但如果你落多啲focus，唔好諗咁多嘢，你做嘅效果其實會再好啲，或者會再靚啲。」他的菱角也被陶泥磨掉，以往等朋友15分鐘都覺辛苦，現在等上一小時也不當一回事。
中環人壓力比天高，陶瓷導師Aidan發現不少人到此學陶藝就是為了減壓，「做完個作品之後佢真係好開心，見到佢啲作品好靚好fine（精細），你估唔到一個咁緊張嘅人，原來可以用呢個方法減壓」。
Aidan透露，不少初學者因為弄毀作品而不快，「我時時都會提住佢哋，做人就好似造泥一樣，你希望造到，但往往未必一次就造到，今次爛咗唔緊要，下次再造過啦！」言下之意，有些人造得出陶藝精品，我造唔出，正如有人老豆係李嘉誠，我老豆唔係，一係等下次（下世），一係搓個李嘉誠公仔出嚟供奉。
中環爆料熱線
WhatsApp：9499 3777
【蘋果互動】有料放？想收料?入嚟啦？
蘋果互動，是蘋果日報與讀者緊密互動，放料及收料的聚腳地。
http://on.fb.me/14ZZe5m