全城熱爆的iBond，今日截飛。入飛情況踴躍，銀行理應好開心啦，點知渣打嘅電腦系統卻頂唔順，經常「冧」機。雖然暫未影響客戶，但如果今日先去渣打入飛，最好預多啲時間喇。
有前線員工爆料話，啲客去到櫃枱申請時，原本職員喺電腦入幾項資料就搞掂，但由於太多人同時申請，導致經常hang機，好多時都要人手填表，等收舖後再將資料入電腦，員工大呻晚晚OT到9點、10點先至清晒即日嘅申請。渣打冇回應電腦系統係咪支持唔住，只強調客戶不會受影響，截止日期前會處理所有申請表；至於加班的前線員工，則享有補時安排。