呢日撞到獅子山學會王弼，諗起小一派位及聖士提反女校轉直資二事，順口問佢：「你當年點解小一派位可以入到聖××？」王弼笑曰：「世襲吖嘛，我阿哥夠運抽到籤入聖××，我以細佬身份申請入學，可以加分，咪入咗囉，之後一條龍升上中學，驚都未驚過，想當年，我即使唔識ABC，都可以入到聖××。」
原來係抽籤決定命運，咁又何解有一位爸爸幾年前已佈局在九龍塘買樓（六百萬元），送兒子入著名幼稚園，要兒子學鋼琴、繪畫，球類活動，甚至攀石，目的只有一個，就係要入喇沙小學，點知抽籤結果出咗嚟，係派去樂善堂小學，富爸爸當然失望。入樂善堂讀書，投資駛唔駛咁大呀？王弼以另一角度睇：「要恭喜呢位爸爸呀，佢買落層樓升晒值，啲教育投資連本帶利起碼賺兩三百萬啦！」
人人都說孩子不能輸在起跑線上，各出奇謀，老餅如左丁山以前諗都未諗過為讀書及訓練小孩子要有今天新進媽咪咁多招數。小VV及另外兩位80後媽咪湊女非常緊張，完全封殺電視，唔俾一歲女兒睇到電視，及唔准睇iPad，以免傷眼喎！小VV只係播CD音樂教兒歌Oh McDonald諸如此類，女兒聽得多，居然已經識得跟住音樂哼兩句。
另外一派就盡量利用電子科技，小YY叫阿媽湊孫，於是阿婆俾嬰兒睇電視，用iPad下載Oh McDonald，七彩卡通畫面，有歌有字，俾嬰兒睇，嬰兒似乎睇得津津有味，而且YouTube有大量英文兒歌，同時教埋顏色（red、white、blue）、動物butterfly，三角形、四方形、圓形，畫面活潑動人，非常吸引。呢位阿婆唔怕孫兒睇得多會傷眼咩？阿婆話：「唔會，每日睇半小時啫，而且分階段睇，人地美國佬咁好心機製作嬰兒活動教學材料，放在YouTube免費任我地睇，唔睇就笨，唔通要等香港製作中文材料呀？」咦，一言驚醒，左丁山問一位教師，教育局撥款幾千萬元俾一啲非專業團體創製電子教科書，有何成果？呢位教師答：「一啲學校試用呢類材料，覺得好失望，非專業團體真係業餘，做出嚟嘅所謂電子教科書完全唔掂，學生完全無興趣，依家好驚教育局丟錢落鹹水海，最後又係向教科書出版商求救！」