【中環】抗癌勇士司馬燕完成咗八次抗癌療程，雖然瘦剩77磅，但精神睇嚟都算唔錯，前日下晝2點幾，司馬燕約咗女友人行中環，佢哋喺置地嘆完high tea後，就孖住逐間名店去濕平，做女人最鍾意嘅活動。
大病初癒嘅司馬燕好小心保護身體，戴住頸巾保暖，着貼身裙襯及膝襪同厚底鞋，打扮到成個潮媽咁，一啲都唔似已經50歲，司馬燕同友人先喺Bottega Veneta店外window shopping，之後佢入去裏面慢慢揀，專攻顏色鮮艷嘅手袋、銀包，襯番佢𠵱家嘅心情。
中途啪藥
其間司馬燕問店員攞咗杯水，見佢飲水時頭岳岳，好似用水送藥，似乎佢仲要食藥調理身體，好在佢濕平都不忘食藥；之後佢攞住袋戰利品離開，再轉去Marc by Marc Jacobs睇裙同太陽眼鏡，依然係以色彩繽紛為主，然後再殺入Miu Miu繼續享受濕平樂，行咗成兩個鐘都冇倦意，仲心情靚靚不時笑容滿面。
採訪、攝影：徐錦池
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！