林鄭出巡受到社民連「熱情」招呼，兩位男司長又有冇「艷遇」？答案係，有人歡笑有人愁。財爺鬍鬚曾噚日擔任屯門龍舟競賽頒獎嘉賓，負責頒財政司司長盃。一班屯門居民雖然一早到場霸位請願，要求政府停止擴建堆填區，但鬍鬚曾接過請願信後，佢哋即時輕鬆放行，而場內人士一見鬍鬚曾進場，即時拍晒手掌歡迎，場面好「和諧」。在場人士更一個接一個搵佢影相，其中一個仲要係新界王劉皇發嘅寶貝孫女，佢似乎好like鬍鬚曾咁喎。
相反去到香港仔海濱公園睇賽事兼主禮嘅律政司司長袁國強，人氣不及鬍鬚曾。身為鑽石王老五嘅佢，上任後首度睇龍舟，但竟然未獲女士們關注，唔單止冇乜嘢師奶簇擁合照，就連向佢請願嘅團體都唔多覺。