康師傅（322）舊年輸得好甘，做慣大佬，一不留神，就俾向來屬於市場underdog的統一（220）追返上嚟。統一的拳頭產品奶茶近年站穩陣腳，單一隻口味舊年就做了30億人仔生意，在奶茶產品的市佔率達60%，康師傅只得16%左右。至於另一戰場杯麵，統一的酸菜牛肉麵亦成功和康師傅的做到「六、四」之比，迫得康師傅去年第三季開始，全面進入「作戰mode」。
分析員朋友說，康師傅近年的簡報，管理層都會花大量口水，講解要點擊倒對手，仲講到明要打到佢「冇得翻身」，狀甚兇狠。
咁康師傅有乜招數呢？講到尾，都係銀彈政策。除了持續「買杯麵送腸仔」之外，據講近月仲發展到買五包即食麵，送微波爐碗、不銹鋼盤、飲品coupon……諸如此類，3月起奶茶又再搞買一送一抽獎。
有分析員估計，康師傅這些花招基本上相等於減去產品的20%毛利，確實是落重本。
如此傷人傷己，是否長遠之計？康師傅的如意算盤係，奶茶、酸菜麵這兩種產品，佔公司整體銷售比重低於一成，但卻佔去統一去年生意的55%及53%。以自己小部份的生意去擊倒別人賴以為生的支柱，相信康師傅會認為很值得，必定把價格戰進行到底。尤其是，統一過去數年大幅擴產，令債務持續增加，如果輸了這一役，統一的確再無太多餘裕去翻盤了。
海迪