當唔少商會大佬隨貿發局招商團去美國「務虛」，八方發現廠商會會長施榮懷寧遠赴瑞士日內瓦開會「務實」。身為勞僱會成員嘅佢，原來第三度去日內瓦出席國際勞工會議，連日同嚟自世界各地嘅工人、僱主同政府代表密斟；罷工、童工以至集體談判權都係重點，有時亦要聽吓一啲勞工個案。
開會聽case當然重要，但阿施話勞資雙方成員喺日內瓦朝夕相對，意義亦好深遠，唔係話委員中有人因此撻着，而係委員之間friend咗，第時有棘手嘢，比較容易有偈傾，唔會吓吓反枱，所以開到坐骨神經劇痛都值得。八方聽落，點都好過跟去美國做佈景板嘅。