端午節，梗係要食糭應節，社民連主席長毛梁國雄都好有心，噚日帶埋五隻「賤糭」入大埔，想畀署理特首林鄭月娥慢慢嘆。但呢五隻「賤糭」唔係鹹肉糭或者梘水糭，而係代表狼振英、張震遠、陳茂波、林奮強同麥齊光嘅「糭」。嘩，咁三尖八角，難怪林鄭啃唔落，速逃現場扮有種。
唔答問題 頒完獎即閃
查實長毛同佢成班社民連戰友真係好有心㗎，噚日一早攞住貼咗以上五個狼班子成員照片嘅「賤糭」，山長水遠去到大埔海濱公園恭迎林鄭，要求呢班人落台，佢哋仲拉起寫有「屈原投江諫昏君，賤糭下海洩民憤」嘅橫額贈「㷫」。點知警察同保安就如臨大敵，組成幾層人鏈擋住長毛，令林鄭收唔到大禮。民建聯都有到場請願，要求盡快興建龍尾泳灘，但一樣埋唔到林鄭身。
睇咗個零鐘頭龍舟賽，林鄭頒完獎即刻閃人，懶理記者問乜嘢都冇答到。民建聯竟然玩搶閘，派人衝前要林鄭收信，結果喺林鄭「應酬」呢班盟友之時，長毛等人亦乘機搶位，企正喺林鄭座駕車頭，想當面送「賤糭」畀佢，點知有班疑似大會糾察嘅橙衣人就夾埋警察拉走長毛，令林鄭得以順利鬆人。而嗰五隻「賤糭」，從此被林鄭遺棄喺大埔，認真陰功豬囉。
mailto:[email protected]
