雅居樂（3383）無啦啦畀多9億人仔投錯地，以11.5億元人民幣買入長沙一幅地皮，較起拍價1.7億元人民幣高出5.7倍？官方就話係國土局電腦系統出錯，所以交易取消，唔會為公司帶來損失，仲話「一個成熟的企業是不會出這種錯誤的」。
烏龍事日日都有，德國就有個銀行職員，因為工作期間周公急call，差啲累個客唔見23億銀。話說佢原本要幫個客過數，涉及金額只係62.4歐元（644港元）。好衰唔衰，佢呢個時候突然瞓着，仲趴喺keyboard壓住個「2」字，總果條數變咗222,222,222.22歐元（約23億港元）。雖然銀行好快發現出錯，截咗條數，但呢個職員「難逃一炒」，事件最後仲鬧上法庭。
雖然個員工冇為公司帶來實際損失，不過因為咁錯法實在太離譜，銀行丟晒假，炒魷亦不無道理。咁亦解釋到雅居樂蝦碌事件發生後，點解快到要當日即時作出回應，始終蝕唔蝕錢都係其次，冇面子事大。
Fifi
本欄逢周二、四刊出