小弟從不否認自己係金魚缸中活躍份子，日中聽埋唔少tips，上星期同《蘋果》戰友唐牛、祝文韜閒聊，結論係「自我研發」嘅股票仲升得多！好似上周介紹嘅瀋陽公用（747），周一最高見過0.97元，短短幾日已累升44%。
其實買佢都係等注資，講開注資概念，又俾小弟搵到隻老牌紅籌中航工業（232），趁未開車可趁低吸納，目標價睇同系中航科工（2357）PB水平，即0.77元，潛在升幅超過一倍。
中航工業母公司係中國航空工業集團，董事長林左鳴之前出席十八大時講過，集團會將資產推向證券市場，考慮將更多同航天相關嘅A股子公司注入中航科工，非航空業務就整合注入中航工業。睇番中航工業最近出售從事航舶、航空航天遙感影像數據處理嘅「天下圖」，應該「好事近」──此舉無非係要將航天相關業務剝離，跟住啟動注資工作，注入非航空業務。
母公司注資好事近
翻查佢母公司之前嘅發債文件，發現中航集團2012年實現營業收入3,006億元（人民幣．下同），按年增13.9%；利潤132億元，增6%；資產總額達5,661億元。按去年總收入3,006億元計，非航空產業收入約1,800億元，佔59.88%，即係話非航空產業收入同資產，較航空相關業務資產大。
照咁睇，中航工業估值應該可以高過中航科工，但𠵱家中航科工trade緊1.8倍PB，至於中航工業就係0.91倍，如果照計數，淨係追番中航科工個估值，中航工業起碼睇0.77港元。
再睇番母公司嘅資產結構，目前可注入中航工業嘅非航空資產多到不得了，包括新能源、新材料、酒店管理、貿易百貨、資源開發以及地產等多方面，全部係𠵱家市場最熱門，另母公司嘅汽車傳動系統市佔率世界第三，鋰電池核心技術國際領先，加埋晒，非航空產業年收入突破1,800億元。嘩！𠵱家中航工業先得17億幾港元市值，真係求其注一嚿入中航工業都不得了。
陳承龍
本欄逢周四刊登