西班牙喺出戰禮拜六開波嘅巴西洲際國家盃之前，禮拜二喺美國紐約同愛爾蘭打咗場友賽，仲靠兩個後備球員入波而贏2:0；表面睇場波好似冇乜特別，但內有玄機，事關正選11人中有8個係巴塞兵，而喺皇馬長坐冷板嘅門將卡斯拿斯，返到國家隊一樣係冇運行。
巴塞兵佔8席正選
西班牙對住殘陣嘅愛爾蘭，半場踢成0:0，去到69分鐘靠後備上陣嘅蘇爾達杜「窩利」射入而打破缺口；到88分鐘，另一個後備兵桑馬達入多粒，幫佢哋贏2:0完場。呢場波狂牛個正選陣，有8個係效力巴塞，分別係域陀華迪斯、碧基、佐迪艾巴、恩尼斯達、沙維、布斯基斯、韋拿及柏度洛迪古斯，餘下3個就係曼城嘅大衛施華，以及皇馬嘅沙治奧拉莫斯同埋艾比路亞。查實喺西班牙足球歷史，計埋今次，總共有3次有8個正選係嚟自同一間球會，之前兩次分別係1959年（對波蘭有8個巴塞兵）及1961年（對法國有8個皇馬兵）。
賽後獲迪帥讚揚
球迷都關心，呢個會唔會係狂牛踢今屆洲際國家盃嘅正選陣容，教練迪保斯基賽後冇話係，但同時亦冇話唔係。如果係真，意味喺剛結束嘅西甲，俾皇馬前教練摩連奴打入冷宮嘅卡斯拿斯，返到國家隊又要繼續坐冷板凳。但迪保斯基有讚呢位喺下半場入替域陀華迪斯嘅門神：「呢場波卡斯拿斯有出色表現，其實全部3個龍門都有機會踢正選，到16號就有答案。」
皇馬呢10年大部份時間都俾巴塞食住，無論本土或者歐洲賽成績，都遠遠比唔上對方；而卡斯拿斯以隊長身份帶領西班牙捧走2008同2012年歐國盃，仲有2010年嘅世盃，可以話係皇馬喺狂牛嘅代表人物；如果佢真係冇正選，皇馬想唔認輸都唔得。