今年E3 Expo重頭戲，擺到明係主機之爭！前日Xbox One宣佈售價499美元，其後發佈的PS4也隨即宣佈只售399美元，更推出疑似針對Xbox One的功能，認真寸爆！來到E3會場，兩大廠商地盤只有一巷之隔，雙雄惡鬥，隨時擦槍走火！
記者、攝影：陳國輝
現場花絮
PS4真機現場試玩
進入會場West Hall，就是各大遊戲廠商的基地，重點當然係PS同埋Xbox，由於兩者位置僅一巷之隔，如果唔使花時間排隊的話，你可以打完PS4再過隔籬玩Xbox One，勁方便，仲近過行去會場洗手間㖭！
究竟哪一部主機的人氣勁啲？見仁見智！小記進入PS區域，首先見到居然是早前於英國公佈的GT6，火紅色試玩車架超過10部；而估不到是，PS4昨日才公佈，今日已經有得玩，還包括《Knack》、《Octodad》、《Warframe》等七至八款遊戲咁多。由於人數眾多，小記只試玩了賽車遊戲《DriveClub》，拎住新手掣的感覺遠比PS3輕身和有握手感；另外，雖然場內主機並不是百分百完成，但從遊戲畫面和流暢度而言，根本毫無問題。現場還見到大量真機，但全部都用玻璃箱封住，睇得唔摸得。
XB One勁多人排隊
一巷之隔，已經到達Xbox地盤！眼見第一樣嘢就係架超豪華跑車，以及接近10台遊戲車架的Forza試玩區，講地方微軟未必夠PS闊落，但勝在有勁多Xbox One的遊戲供試玩。除了《Forza MotoSport 5》、《Halo》以及《World of Tanks》外，個人感受最深就係以羅馬帝國時期為背景的《RYSE: Son of Rome》，遊戲背景設計勁真實之餘，還有攻城、單拖等唔同戰鬥方式，雖然很多人排隊試玩，但睇片段介紹已經好吸引。
至於很久未聞大作的任天堂，由於今年無新主機，氣勢明顯不及Xbox同埋PS咁勁！主打作係Wii U的《Mario Kart 8》、《Donkey Kong Country》，還有《The Legend of Zelda: The Wind Waker HD》等，雖然大部份係食前作的名氣，但試玩人士當中，話唔定好多都係老任粉絲，既然咁多人Buy，難怪場內超擠逼啦！
DR3喪屍屋最搶鏡
會場另一端的South Hall，則係遊戲製作商必爭之地！今年邊一隻最好玩，最值得期待，暫時尚未知道，但講到最吸引現場人士，首選肯定係Capcom喪屍屋！呢個佈景其實為宣傳動作遊戲《Dead Rising 3》而設計，現場唔只有間超爛紅磚屋，四周圍仲滿佈血淋淋的斷肢，更有喪屍搶食畫面，突然間佢仲會走埋嚟嚇你，幾得人驚㗎！
純粹個人喜好，我就比較期待Konami的《Metal Gear Solid》以及《PES 2014》，事關玩咗蛇叔咁多年，始終都有感情；而且今集佢仲加入Dynamic CQC兼採用實時制度，影片中更經常見到蛇叔駕駛唔同交通工具四圍走，好有新鮮感喎！
