周一晚美股反覆靠穩，滿以為大市在21400可來一次雙底反彈，換來的卻是徹底失望。恒指周二埋單跌260點，收報21354，創出今年新低，個股升跌比例2︰8，十隻股八隻跌，難怪個個戰友都牙痛咁聲。周二推介嘅順誠（531），乃少數能逆市上升嘅奇葩，更一度大升12%，逼近短線目標價1.86元，希望可為戰友打打氣。
今日推介嘅鞋履、手袋及配飾股利信達（738），與順誠有着同樣三大特質──增長勁、派息高及圖表靚，值得望多兩眼。公司剛公佈截至5月底止首季零售業務數據，總銷售及同店銷售錄得「雙升」，分別增長19.2%及14.7%，喺正在轉弱嘅零售市道下，絕對有交代。講派息，利信達自2004年起，中期及末期都有息派，近年更每年遞增，以去年全年派息14.2仙計，息率達5.3厘，好過唔少公用股。睇圖表，利信達周二逆市炒高7.2%報2.67元，突破5月高位，日線圖呈靚圓底，見三字頭難度不大。
唐牛