𠵱家全球巿場關注嘅問題，相信唔少得美國係咪退巿、幾時退巿同點解退巿。美國聯儲局主席伯南克講一句嘢，都會令大家估估吓，係咪暗示緊任何同退巿有關嘅嘢。之但係有個人，就同伯老熟到可以大講退巿喎，嗰個唔係乜經濟學家，而係利豐（494）主席馮國綸！
舊年撞到傾咗兩句
因乜事伯老會特登「召見」馮生講退巿？非也，其實伯老喺馮生嘅母校（普林斯頓大學）曾經教過書，佢哋咁啱見到面，就傾咗兩句。不過大家唔好諗住有乜獨家消息，事關馮生都只係講話，如果美國退巿，唔會一下子收水，會一步步慢慢嚟。仲話如果係好似巿場咁講，2015年退巿的話，而家就會開始收水㗎喇喎。
之但係最近伯老上國會，又似暗示唔會咁快收水。馮生就話「做官梗係講同做係兩回事，尤其是係金融巿場」，唔通暗示啲官都鍾意講一套做一套？不過馮生同伯老上次傾計，都已經係舊年年頭嘅事，話晒都隔咗咁耐，改變主意都唔出奇。