雅虎行政總裁邁耶，學「股神」畢菲特同蘋果行政總裁庫克，參加慈善午餐拍賣，中標嘅幸運兒，可以同靚媽邁耶到雅虎總部嘅飯堂食晏一粒鐘，而所得善款將會捐畀加州一間學校。
靚媽邁耶嘅慈善午餐拍賣前日起接受競投，直至本月27號結束，短短半日，嗌價已經去到6.25萬美金，約49萬港紙，較底價高十倍。有人話，花錢同邁耶去雅虎總部飯堂「URLs」開餐，抵玩過跟庫克返蘋果公司嘆咖啡喎。
雅虎總部內有四個飯堂，而且免費向員工提供膳食。「URLs」就係靚媽邁耶最鐘意嘅飯堂。「URLs」早、午、晚三餐俱備，特色小食如椒鹽雞翼都有。雖然雅虎飯堂美食包羅萬有，大家醉翁之意不在酒，最想都係聽吓邁耶有乜新諗頭。