小明今年唔再上廣州，反而上港大！香港大學畢業生議會幹事會噚日起選舉新幹事，8名任期屆滿嘅幹事退位讓賢，由11人競逐8個空缺，候選人中包括已退休嘅駐京辦前主任曹萬泰、副廣播處長戴健文，以及能醫善唱嘅兒科醫生李家仁。可惜以一曲《小明上廣州》紅爆嘅李醫生，話暫時未打算唱番首「小明上港大」助選，「港」大樂迷冇耳福嘞。
爭做畢業生議會幹事
話說八方知道小明參選，即刻問佢點拉票？點知小明話至今都唔知道選舉實況，只會做好份內事，而且佢呢兩日仲有其他嘢忙緊，要過埋端午節，即係今日，先得閒「拜票」。小明懶懶閒係正常嘅，事關呢個議會平時都唔覺有乜嘢實務，好多港大校友都視佢為「圍威喂」吃喝玩樂舊生聯誼會。
但今年傳出11名候選人其實分兩張名單分庭抗禮，有指小明同曹萬泰、戴健文等屬一組，另一張名單則由商界精英組成，先惹起人少少關注。
有人仲話商界名單中有紅色背景人士，有疑似赤化議會之嫌。睇番候選人名單上，內地背景最濃厚嘅係2001年哲學碩士畢業嘅劉紅進。佢係清華大學首批入讀港大嘅交流生，畢業後加入香港警隊做過督察，𠵱家就喺中電做公關經理。但戴健文同八方講，議會選舉年年有人爭，唔覺今年特別激烈，更加唔覺北京滲入。
有港大校友話呢個議會素來甚少同校方或政府唱反調，雖然議會有15個代表可以進入港大校董會，但校董會本身只係橡皮圖章一塊，諷刺議會連想俾阿爺搞嘅資格都冇喎。
mailto:[email protected]
【蘋果動新聞】Android App 修正版上架
回應讀者要求，Android App修正版改善記憶體使用情況，以及廣告顯示模式，即刻去Play Store下載啦！↓↓
http://bit.ly/appledailyupdate