（喜）周二晚喺北京舉行嘅國際友賽，收足戲金嘅荷蘭作客中國做到嘢，以2:0擊敗大部份時間踢少個嘅「龍之隊」。
據報，荷蘭今次收取咗賽會1,000萬人民幣嘅戲金，唔知係咪咁，所以世界排名第5嘅「橙衣兵團」絕無欺場，尹佩斯、洛賓及施安迪莊等主力悉數正選。為咗迎合中國市場，佢哋球衣上唔用英文名，改用國內譯名。剛替拜仁慕尼黑奪得3冠王嘅洛賓，喺11分鐘殺入禁區，引嚟效力廣州恒大嘅中國守衞張琳芃犯規；球證判罰12碼。荷蘭劊子手尹佩斯勁射入網，助球隊先開紀錄。兩分鐘後，另一位恒大球員犯錯，防中秦升飛鏟約拿芬迪根斯文，動作粗野，做咗「紅牌阿姑」。之後，踢多個荷蘭圍攻中國，甚至喺前場逼搶，態度認真，半場領先1:0。
換邊後，荷蘭立刻有個黃金機會，但尹佩斯先射中柱，而洛賓嘅補射又中楣。66分鐘，洛賓傳中，後備入替嘅史奈達表演後腳射入，為荷蘭鎖定贏2:0。
【蘋果動新聞】Android App 修正版上架
回應讀者要求，Android App修正版改善記憶體使用情況，以及廣告顯示模式，即刻去Play Store下載啦！↓↓
http://bit.ly/appledailyupdate