夏日戀事多，由於歐洲主要球季已唞暑，造就咗好多球員及球圈人士趁暑假結緍，而最新一單係意大利前鋒「腦殘」巴洛迪利據報以10萬鎊（約120萬港元）嘅鑽戒求婚成功，好快會同女友芬妮拉埋天窗。不過，睇芬妮喺Instagram上載嘅求婚鑽戒，橫睇掂睇都唔似要百幾萬，究竟係「腦殘」俾人呃定係佢呃人呢？
干地拉埋天窗
喺今個夏天，歐洲球圈真係喜事重重，繼早前曼聯後衞莊尼伊雲斯結婚後，多蒙特嘅德國後衞舒姆沙，以及祖雲達斯少帥干地，最近都舉行過婚禮。唔知係咪畀呢股全城熱戀嘅氣氛感染，效力AC米蘭嘅巴神據報最近亦求婚成功，將會同拍咗拖半年嘅比利時模特兒女友芬妮拉埋天窗。據悉，22歲嘅巴神可以求婚成功，同佢有「秘密武器」：價值10萬鎊嘅求婚鑽戒有關；而芬妮更喜氣洋洋咁喺Instagram上載咗隻求婚鑽戒，仲寫住：係正式㗎……好似我咁（It official...Like me）。
求婚一剔過
不過，我求大俠睇番芬妮上載嘅求婚鑽戒，雖然款式唔錯，好大方得體，但粒鑽石就唔多巨型，點睇都冇兩卡，話值10幾萬港幣我就信，但講到值10幾萬鎊，就真係冇乜說服力囉！咁我求大俠就諗喇，究竟係巴神視錢財如糞土，所以豪花10幾萬鎊買隻咁嘅鑽戒，抑或係一向講嘢唔經大腦嘅巴神，同芬妮亂咁吹水，話隻鑽戒值咁多錢呢？
不過，無論如何，佢哋兩個𠵱家真係如膠似漆咁，巴神之前亦講過：「我可以同好似芬妮咁嘅人共度一生。」而據佢哋身邊嘅人講：「巴神同芬妮之前都講過結婚嘅事，但今次就明顯係嚟真，佢向芬妮求婚，而芬妮亦欣然接受，佢哋會先度假，之後就會計劃人生大事。」
【蘋果動新聞】Android App 修正版上架
回應讀者要求，Android App修正版改善記憶體使用情況，以及廣告顯示模式，即刻去Play Store下載啦！↓↓
http://bit.ly/appledailyupdate