威高股份（1066）自從在5月底公佈首季多賺近7%後，股價就一度炒高逾三成，最高見10.70元。近日升勢暫緩稍作調整，昨日跌逾3%收9.96元。對於威高前景，摩通話係「年度首選」，高盛就「降級叫沽貨」，兩家大行擺明打對台，鬥眼光。
摩通高盛打對台
上月底摩通發表報告，指唔單止睇好威高產品組合改善，毛利率上升，仲話預計骨科及腹膜透析業務前景好，將會帶動銷售復蘇。加上公司不停招聘售貨員又重組銷售團隊，咁積極改革，盈利遲啲就會反映出來，繼續加碼入貨應該冇錯！
不過，高盛一星期之後就發表報告「柴台」，第一句就話威高炒到咁高，根本就冇基本因素支持，而且估值貴到死，高過晒同行，市場將會開始調低盈利預測。又話威高重組銷售團隊，即係要使好多錢，就算下半年銷售改善，盈利增長都受壓，一於降級至「沽售」，目標價維持7.50元。
根據彭博綜合報告，四成半大行都建議持貨，沽同買嘅比例就叮噹馬頭，睇嚟大家都以不變應萬變。但睇技術走勢，威高舊年12月開始持續橫行一段時間，直至4月尾先打破悶局。5月底又突然出現一支大陽燭，完美補回去年11月的大裂口。近日股價稍作回調，但成交唔算太多，有「造旗」迹象。若守得住9.80元水平，隨時阻力位變支持位，如果有貨的話，不妨睇多陣先決定沽唔沽都未遲。
瑪姬兒
【蘋果動新聞】Android App 修正版上架
回應讀者要求，Android App修正版改善記憶體使用情況，以及廣告顯示模式，即刻去Play Store下載啦！↓↓
http://bit.ly/appledailyupdate