無綫呢期播緊嘅劇集《情越海岸線》同《好心作怪》都正正常常，所以收視唔錯，上星期首播嘅《好心作怪》平均有24點（約154萬觀眾收看），最高26點，比起對上一套《金枝慾孽貳》升咗4點咁多，《情越海岸線》都保持喺平均25點（約161萬觀眾），最高29點，原來除咗無綫劇集收視有起色外，估唔到亞視都有收視奇葩喎！
另類慳錢方法
近排有啲師奶觀眾追睇亞視套外購劇《木府風雲》，前排亞視發新聞稿話呢部呂良偉、于榮光、韓國女演員秋瓷炫同國家一級演員潘虹主演嘅大型民族歷史劇，「在中央電視台黃金檔播映時，收視率最高達2.22，排名全國第一，更是中央電視台有史以來第一部收視破2的電視劇集。」個劇喺亞視播比上套《新萍踪俠影》收視勁升一倍㗎，不過就係由1點勁升到𠵱家嘅2點（約12萬觀眾）咁大把囉！
講起劇集製作，亞視為咗慳皮所以冇再拍自製劇，其實仲有一個好好嘅慳錢方法，根據上星期嘅收視調查報告，亞視喺星期一至星期六夜晚十一點三打後嘅收視全部係零，有網友講笑話係咪亞視喺嗰個鐘已經收咗台冇節目播，所以得零收視？既然係咁，建議亞視索性成個台熄燈閂門收工，連電都慳番啦！
而噚日通訊事務管理局共收到四個投訴，話《好心作怪》欠新意、醜化警察能力同對白粗俗等，《情越海岸線》就有兩宗。
版主：陳基征
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！