舊年特首小圈子跑馬仔期間，狼英與唐唐相繼出事之際，一度表態有意替補入閘選特首嘅立法會主席曾鈺成，無意再入閘咯，原因係佢口水多過茶。
曾鈺成接受now新聞台訪問時話從政20幾年，經常評論政治議題，由此已經證明無意選特首啦，因為如果真係有意出選，就要諗咁多評論係會加分定減分？事實證明，講得多，肯定係壞事，佢笑笑口話以往有辦大家睇，「悶聲發大財，先最聰明」，怪唔得狼英未鐵定選特首前，對記者都好似人肉錄音機咁啦。
曾鈺成至今堅持中央唔會有Plan B，佢嘅理據係，咁樣會動搖軍心，而且到𠵱家為止，邊個人做特首都冇成個班子出到來，暗示冇政治人才，點搞替補？口水多多嘅佢喺節目又發作，話泛民要求2017年冇篩選係假議題，因為即使一萬人提名，都係叫篩選。
【蘋果動新聞】Android App 修正版上架
回應讀者要求，Android App修正版改善記憶體使用情況，以及廣告顯示模式，即刻去Play Store下載啦！↓↓
http://bit.ly/appledailyupdate