歐洲主要球季歇暑，但有好多熱身賽同慈善賽睇。喺星期日，巴拿比奴上演咗第4屆「經典之心」慈善賽，皇馬元老隊就以2:1擊敗祖雲達斯元老隊。其中先後代表兩隊出場嘅法國球王施丹，就打波都掛住買人；身為皇馬顧問嘅佢，賽後不忘放風，暗示會用破世界紀錄嘅8,500萬鎊（約10.3億港元）轉會費羅致熱刺嘅加里夫巴利。
踢慈善賽不忘買人
呢場慈善賽星光熠熠，除咗施丹外，仲有費高、列當度、布達堅奴、尼維特、簡拿華路同費拉拿等殿堂級球員，令球迷睇到如癡如醉，而結果皇馬元老隊就以2:1勝出。是項慈善賽由皇家馬德里基金會主辦，本屆賽事所得善款將捐畀西班牙紅十字會嘅學校兒童午餐計劃。不過，施丹喺做善事之餘，不忘為西甲班霸皇馬買人，喺比賽中交出一個靚助攻嘅佢賽後話：「加里夫巴利炙手可熱係意料中事，佢喺剛結束嘅球季表現咁神勇，又點會唔傳出歐洲大球會想買佢呢？」
呢名皇馬顧問兼體育總監又繼續話：「若有球會想買走巴利，一定要開出熱刺無法拒絕嘅價錢，相信甚至要破世界轉會費紀錄先至得。就目前嚟講，相信有4、5間球會出得起呢個價。」
10億都畀得起
目前嘅世界轉會費紀錄係基斯坦奴朗拿度（C朗）以8,000萬鎊由曼聯轉會皇馬時所創，由於施丹喺皇馬買人方面揸晒旗，加上皇馬又對巴利志在必得；照佢咁講，皇馬咪好有機會用破世界紀錄嘅8,500萬鎊羅致23歲嘅巴利！
【蘋果動新聞】Android App 修正版上架
回應讀者要求，Android App修正版改善記憶體使用情況，以及廣告顯示模式，即刻去Play Store下載啦！↓↓
http://bit.ly/appledailyupdate