【圓方】潮媽陳慧琳（Kelly）大前晚同老公劉建浩、大仔劉昇（蝦餃仔）去圓方行街，享受悠閒嘅周末時光，只有一歲嘅細仔劉琛（小龍包）因為年紀仲細，留喺屋企覺覺豬免去人多地方，而就嚟四歲嘅蝦餃仔得到媽咪真傳，年紀小小卻長得好高，已經到媽咪條腰咁高。
劉建浩買定漢堡
Kelly一家三口行到夜晚8點幾就返歸，戴口罩嘅Kelly一馬當先行去停車場，蝦餃仔緊跟媽咪身後，劉建浩手上攞住個漢堡包，唔知係咪怕蝦餃仔搭車肚餓買定呢？Kelly去到停車場後，即刻拖番囝囝隻手，可能擔心停車場有車出入危險，認真係小心媽咪。
不過，蝦餃仔似乎想自己行，唔多肯俾媽咪拖手仔，越行越慢有啲扭計，Kelly捉實囝囝隻手唔放。記者上前問Kelly係咪同家人食完飯，掛住湊仔嘅佢冇答問題，反而問記者邊間報館，之後就同囝囝上車，老公就做柴可夫揸車返家。
採訪、攝影：羅德光、彭琮然、梁繼光
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！