賭王二房旗下的信德（242）上星期斥5億入股捷星香港（Jetstar），和東航（670）、澳航合作搞廉航。
其實賭王進軍航空業，早就有前科，不過多年來都係私人投資玩玩吓性質為主，無咩大發展，股權幾年後又轉手賣畀人。反而今次愛女超瓊，大張旗鼓以上市公司名義入股捷星，說明了她今次是動真格，真心想食大茶飯。
當年開業僅1年就要執笠的甘泉，死因除了香港航空霸權之外，佢本身經營也可話係「亂咁嚟」，例如財力不足就去買大型飛機，一開始竟然搞多倫多、倫敦呢啲長途航線，所以佢失敗未必具有太大指標性。香港廉航滲透率奇低，市佔率得6%，相比新加坡、東南亞等地區，至少有25%至40%，齋睇呢個數，香港廉航市場真係潛力無限。
不過事出總有因，廉航係香港一直搞唔起，最大的問題係成本和時段分配。身為全球最繁忙機場的香港，收費之貴喺全球亦數一數二，加上人工唔平，不利廉航營運。而且香港講咗Ｎ年的第三條跑道，2020年前都無影，以現時機場已爆到七彩嘅89%使用率，捷星想搶到足夠嘅升降時段，肯定難過登天。所以就算賭后攞到牌，呢場豪賭勝負如何，仍然難料。
海迪
【蘋果動新聞】Android App 修正版上架
回應讀者要求，Android App修正版改善記憶體使用情況，以及廣告顯示模式，即刻去Play Store下載啦！↓↓
http://bit.ly/appledailyupdate