朱璇同陳逸璇噚日喺觀塘apm出席父親節活動，朱璇大晒白滑靚腳，不過就被已為人妻嘅陳逸璇條事業線搶晒鏡，朱璇笑言自己走人妖路線，仲話希望大家可以接受佢變態一面。最近被指生活好潦倒嘅台灣藝人范植偉，曾經同朱璇合作過電影《淚王子》，問佢哋有冇聯絡？朱璇有點驚訝話：「點解咁問？佢呢兩日真係搵過我，有send message問候。」朱璇仲透露范植偉有興趣嚟香港發展，不過佢就閂閘話幫唔到男方搭路。
笑廣東話差
朱璇話范植偉啲廣東話仲差過自己：「如果第時有劇係講普通話就可以搵。」如果范植偉要求喺經濟上幫手？佢笑言：「幫到一定幫，不過我都係幫唔到手。」對於范植偉嘅負面新聞，朱璇只聽聞佢同王心凌嘅密照事件，話件事唔係太好，仲劃清界線話拍完戲同范植偉就冇乜聯絡。另外，范植偉噚日喺微博透露搬屋，仲上載咗張雙腳同舊屋嘅相，佢話：「離開這間漂亮的屋子，心中很是不捨。」
撰文：馮仁昭
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！