家住新界區，網上開了一個「我是XX人」的群組，內容當然是該區大小事務。你可以說這些都是瑣碎的枝節，譬如街燈熄了，紅綠燈壞了，巴士站隔籬個垃圾筒超污糟。
太座是這個群組的常客，因為可以知道很多八卦資訊，譬如那個居民是放狗罪人，每次都縱容狗隻隨處解決，到處留尿，影衰愛狗人士。
有一次，太座興高采烈告訴我：我終於解開了點解蛇齋聯會喺呢區勝利的原因了？
我打個呵欠：不就是蛇齋取勝嗎？
太座發現新大陸：不，因為佢地個區議員真係有做到嘢。
原來這個蛇齋聯的區議員，知道有這個社區群組後，如獲至寶，不斷留言跟進；有人投訴食肆污糟，區議員馬上查詢位置；有人投訴條路挖爛咗個窿好耐無人整，區議員又會仔細追問「個窿幾大」之類的問題。
最重要是，問完的確有下文，未幾便會看見「條路整番好、盞燈著番啦、垃圾筒唔臭啦」的「成功爭取」的戰績。你可以嘲笑，但佢真係幫咗居民。更重要的是，整個群組，只有蛇齋聯的區議員出現，其他對手，全無蹤影，點投得落手？
難怪選民會投蛇齋聯，你不能嘲笑選民只顧眼前小利而忘記香港整體民主大局云云，民主不知何時有，但行人路個窿就每天都相見。
泛民不能只食民主老本，深耕細作，多留意這些社區群組，主動替市民處理民生實事，每個社區群組等於一個免費議員辦事處。利用網絡平台，但不限於Facebook分享宣傳短片，而是像玩RPG，主動接任務、解題、成功爭取、賺經驗值、選舉升級。這些社區群組，名副其實，目標觀眾喺晒度，等你sell。
不要再在選舉失利時，怪責選民眼光短淺，你首先要讓人看見你啊﹗