資深物業投資者施佳龍玩過界，入股金至尊母公司香港資源（2882）。聯交所資料顯示，施佳龍上周三（6月5號）喺市場以每股0.18元，掃入1.46億股香港資源，涉資2,628萬元，對於買賣物業億億聲嘅施佳龍，呢手貨應該濕濕碎。
施佳龍原本持有香港資源1.8%，增持至6.62%，超過5%，因而曝光。咁啱香港資源6月4號以相同價格批股，一買一賣似係同一件事。喺物業市場，施佳龍最近就沽咗北角電氣道一幢商廈，套現3.55億元。
香港資源由全國政協委員黃英豪打骰，早年股東陣容星光熠熠，四叔都關事，前年黃英豪被老廉請飲咖啡，其後喺財經圈轉趨低調。雖然周街金飾喺呢幾個月賣到斷晒市，但刺激唔到香港資源股價，公司好似仲幾等錢使，今年一月供股籌集逾1億元，上周又批股集資3,500萬元。
【蘋果動新聞】Android App 修正版上架
回應讀者要求，Android App修正版改善記憶體使用情況，以及廣告顯示模式，即刻去Play Store下載啦！↓↓
http://bit.ly/appledailyupdate