父親節陪阿爸飲茶？DIY小禮物？為人子女的費盡心思，當父親的原來另有想法：新手爸洪天明說不需禮物，因為有了他「初戀感覺返晒嚟」；女兒才七個月大的陳國邦已憧憬女兒將來約他飲茶慶節，還有黃家強、區永權、高皓正，一人一個父親節願望。
記者：梁劍紅 攝影：陳永威、潘志恒、部份圖片由受訪者提供
論盡爸洪天明 啜鼻屎都爆冧
「未試過咁掛住一個人，好似初戀咁。」弄得天明托着腮如情竇初開，是五個多月大的洪大仁（TJ）。說起第一次見到囝囝笑、第一次為他洗白白，天明口中是沒完沒了的「好好笑」、「好得意」。憶述首次替囝囝換「屎片」更笑得眼睛瞇成一線，直言怕髒一直不願出手，一天僅他與工人在家，TJ突然便便，他如臨大敵：「同工人一人掹一邊腳係咁抹，怕望到已想嘔。」另一次伸手指檢查尿片，「一撩就成篤（便便）喺手指！好彩唔臭。」唔臭？是新任爸媽「連BB啲屎都話香症候群」發作吧。有次沖涼更驚險，「論盡跣手，佢成個舂落去半塊面喺水，好驚！」也不怕替囝囝啜鼻屎，未通，再啜，鼻涕都啜到口裏去，他也想像不到自己如此輕易就豁了出去！不過，最深刻的則是TJ出生不久，他返內地工作前一晚，眼神仍散渙的TJ忽地定睛看着自己：「佢個樣似我嘛，（看着他）就好似望住自己，佢眼神好深情，好似有話想講，嗰下好深刻。一走就好掛住，腦入面經常浮現佢當晚點望住我。」為解「單思」之苦，他叫太太周家蔚多拍片，更游說老友錢嘉樂、吳彥祖仿效，「隨時重溫，日日睇，重複又重複，唔厭㗎！」連平日Cool爆的洪金寶都被TJ融化，竟罕有主動來電問候：「點呀近排？」天明：「剛剛拍完嘢返……」豈料老頭子搶白：「唔係問你，問你個仔呀！」他感恩TJ的出現，把父子距離也拉近了。「湊初生B好辛苦，照顧佢、擔心佢、陪佢，係另一種體驗，但好Enjoy，見到佢笑，乜都覺得值返晒！」首個屬於自己的父親節是否寧舍不同？「冇乜特別喎，多咗件嘢喺到囉（笑）！禮物唔重要，人喺度陪我就夠！」說罷，眼睛又瞇成一線。
冷靜爸陳國邦 錫錫是「家規」
「瀨嘢！」去年在演唱會宣佈有喜的羅敏莊（Mimi），為老公陳國邦誕下胖嘟嘟的女兒陳禛。從沒想過生兒育女，知道老婆有喜，阿邦還一貫淡然：「冇乜特別感覺！」問他首年以爸爸身份過父親節心情如何，他也給記者相同答案。Mimi解話：「佢連我生日都記錯，佢係咁㗎，哈哈哈……」例如，他五月初找爸爸吃飯給點零錢說是慶祝父親節，他爸說：「六月先係呀！」自言從沒節日觀念，也沒物質要求，對七個月大的陳禛竟有很長遠的憧憬：「我諗阿女大個，我可能會介意：今日父親節喎，衰女仲唔打嚟？仲唔叫我飲茶？真係父親節同我食飯，我一定好開心！」這個說話時沒甚麼表情和尾音的父親，說起女兒終於溫柔起來。生孩子，於他，從前覺得是負擔，現在卻認為「幾美滿」、「值得做」，看着陳禛睡覺、為她掃背已覺滿足，有約會也盡量一家三口齊出動，「等佢可以參與，食唔到其他嘢咪畀條菜佢慢慢嗒。」阿邦直言許多父母都愛貼滿一屋子女畫的畫：「好醜樣，得佢哋覺得靚㗎咋，但我諗我到時都係咁，哈哈哈……」說罷，與Mimi來個嘴對嘴Kiss，阿邦貫徹淡然：「佢（女兒）好快都會識（Kiss）。」原來錫錫是陳家「家規」，唔識唔得。
好玩爸區永權 做康樂組組長
過檔now TV主持親子節目的區永權（Albert），常帶同大仔靖嵐Aidan（約兩歲半）及細仔靖崋Ambrose（歲半）一起亮相節目，訪問星級媽媽李嘉欣、陳慧琳、張栢芝等，大講湊仔經，每次連太太及工人總動員，少點精力也不行。太太是全職媽媽，Albert下班後便返家幫忙照顧兩兄弟，他坦言兩夫婦都是24小時當值，但他相對較有喘息空間：「所以我係康樂組組長，亦係情緒輔導員！」今年父親節，他預算如常與家人外出吃飯，但別小覷這背後的艱巨：「每次出街就等於湊仔任務，好多嘢要處理，試過預一點出門口，最終三點幾先行得，細佬飲完奶，哥哥又話換片，飲完又嘔奶，每次都遲到。」訪問期間拍攝全家福，Aidan就有點睏而不在狀態，Ambrose則蹦蹦跳，夫婦二人只好又叫又笑又用玩具哄兩兄弟，記者滴汗，他卻說：「咁已經係好好喇！」父親節收甚麼禮物最開心？「佢哋一齊唱首歌已好滿足，唱埋和音應該幾感動添，可能會喊！但實際啲，最希望佢哋少啲打交，多啲相親相愛！」原來，Aidan最初很疼弟弟，但某天發覺「咪細佬識行嘅？」唔對路，原來弟弟不是他的寵物，自此便呷醋，開始爭寵爭玩具。他認為，嚴父角色是必須的，孩子畢竟要約束，否則無法無天：「又要嚴父又要亦師亦友，好難做，但我學緊！」
直接爸高皓正 生到冇得生為止
「講聲我愛你、錫我一大啖，呢個就係最好嘅父親節禮物！」有「高主教」之稱的高皓正（Zac），言論一向出位大膽，除了那些驅魔信主話題，談起一歲四個月大的女兒純意，他雀躍非常：「囡囡只係叫聲dada我就好開心，老婆話我個樣冧到，從來未見過！」主教說，純意令他與爸爸及太太關係更深，他很想生多幾個，笑言生到冇得生為止，此外，他還想領養，原來，「我爸爸係孤兒，入行後亦探訪過好多孤兒院，發現好多小朋友好孤單，想帶多啲愛畀人。」常與圈中基督徒四出傳道，固然想純意信主：「如果將來佢揾個信神嘅男仔，我會放心好多；若佢真係唔信都冇得逼。」早前他主張的「拒婚前性行為」及「性沉溺」論鬧得熱烘烘，擔心女兒將來偷偷與男仔「曳曳」嗎？他：「啋！同佢溝通下囉。」那如何解釋自己也曾性沉溺？「直接講，唔使羞於啟齒，我又讀過性學，性健康係超級緊要㗎！」父親節當天，他會買個小蛋糕，盼女兒明白，這天是慶祝爸爸一直所付出的，今天，爸爸就是主角。
易𠱁爸黃家強 最緊要阿仔開心
今年正直Beyond成立30周年，剛忙過演唱會的家強，又準備到台灣及內地演出，但他表示仍會與家人慶祝父親節。數數手指，原來今年已是第七年以爸爸身份過節，但在家強心中，似乎他的爸爸才是主角：「爸爸很喜歡吃生蠔，會找一家有生蠔的自助餐，讓他盡情吃個夠。」自己又怎樣慶祝？原來六歲長子慶陽已事先張揚，會親手做父親節卡送給他，還會寫上「爸爸我愛你」！家強印象最深的，是這個小豆丁曾將一個買電池附送、很心愛的小型電筒贈予他作生日禮物，家強：「雖然冇乜用，但呢樣係佢最鍾意嘅嘢，好窩心。」今年的父親節願望，他希望慶陽學琴有進步，歲半大的細仔曜陽可考到好學校。他說，慶陽自懂得走路，聽到音樂便會跳舞，曜陽出生至今，聽到音樂也沒特別反應，他始發現，音樂細胞真是天生的；但也沒所謂，只要兒子開心，做個善良和對社會有貢獻的人，他便滿足。
場地：點一龍（洪天明）、沙田凱悅酒店（陳國邦）、WISE KIDS（區永權）