上個禮拜，孫柏文講咗60、70年代殖民政府面對重重非法外圍同官員貪污猖獗嘅問題。其實，我都未講當時繼外圍馬後，另一為犯罪集團帶來龐大利潤嘅博彩項目——字花。
當時，一個搞賽馬嘅團體，諗都未諗過會幫到取締呢個博彩項目。有如政府叫香港足球總會搞百家樂賭廳般。不過因馬會喺香港社會，一路都係首屈一指有誠信嘅機構，所以就擔起重任，搞咗惠澤社群嘅六合彩，之後就真係令到字花消失了。
中國彩票市場大
我已經一連三篇講香港賽馬會及令賭博合法化對政府管治、社會和諧起乜作用，其實唔止香港。睇英國，我成日笑話喺96年奧運會，《天佑女王》只係奏過兩次，一次英國，一次香港（李麗珊yeah），不過當英國推全國彩票（National Lottery）之後，將所得嘅收益擺落運動員培訓，喺16年後嘅倫敦奧運，就成大陸同美帝之後第三最多獎牌國。
咁我國就深明呢個道理，因由78年改革開放以來，唯一一次全國人民自發性上街慶祝，就係當國家足球隊喺外圍賽取得2002世界盃入場劵嗰晚，周街有人嗌「米路」。咁所以大陸都有搞彩票——中國福利彩票同中國體育彩票。
喺2012年，全國彩票投注額超過2,500億元人仔，仲不斷雙位增長，而如果追到香港2012年平均每人1,100蚊買落六合彩嘅話，大陸彩票市場投注額仲要升多四倍。
而好幾年前熱炒大陸彩票概念，香港上市幫嗰兩隻彩票提供支援服務、彩票供應等嘅御泰中彩（555），當年炒到600幾倍市盈率。好啦，呢啲嘢個個當年話係長線，喺六年後嘅今日，盈利升咗差不多40倍，股價反而跌咗，無辦法唔熱炒就係咁，結果就係市盈率得六倍幾，派息仲年年加。買佢有如做馬會六合彩股東，落到呢個價我鍾意，禮拜四再講佢盤數。
孫柏文
獨立股評人
http://facebook.com/shuen
本欄逢周二、四刊出
【蘋果動新聞】Android App 修正版上架
回應讀者要求，Android App修正版改善記憶體使用情況，以及廣告顯示模式，即刻去Play Store下載啦！↓↓
http://bit.ly/appledailyupdate