好多年輕人取得成人身份證後第一件想做的事就是去學車，二十歲出頭的𡃁模Jumbo（曾淑雅），今年亦喺香港駕駛學院踏出「學神」呢一步。第一堂學車，羅Sir話開車基本功固然重要，即係開車前調校座椅、倒後鏡和波箱。不過能夠解決問題就更加叻，好似Jumbo一開車就遇到上一手學神唔覺意將軚盤鎖死，Jumbo騰晒雞。羅Sir隨即教她輕轉軚盤，然後轉動匙膽便能啟動引擎，仲話有好多司機都未必知如何解鎖。駕駛棍波車講求離合器與油門的接合，亦是不少學神第一個最難掌握的技術。雖然男仔頭Jumbo經常認叻，但學揸棍波車時也好難唔認衰，首五分鐘不斷死火，舉步維艱。羅Sir話佢太性急，時常過早釋放離合器導致死火，最緊要感受到接合時出現的微震感覺。由每次起步都死火，到相隔幾分鐘先死一次，練習一輪之後已有改善，羅Sir話女仔嚟講、再加上第一次接觸手波車，算唔錯囉。
撰文：悠樂長 攝影：伍慶泉
