唔影響經濟
【區龍宇 勞工世界網】
「佔中好緊要係令普羅市民參與，建制派打壓你唔係關鍵，但打你嘅時候普羅市民袖手就大鑊。我哋唔需要等下一個商討日，𠵱家就向周圍嘅團體發動佔中、討論佔中。有人話佔中影響經濟，影響邊個嘅經濟？佔中爭民主就係為普羅市民可以安居樂業生活。」
普選好美麗
【錢志健 對沖基金經理】
「佔中要成功，要更多英文傳媒去報道，如CNN、BBC等。有學者話佔中損害經濟，一日損失幾多億，我認為對金融業冇影響，完全冇，反而評級會更好，因為政制改好，透明度更高，而且一人一票選特首，每一票等值，係好美麗嘅事，唔好只用經濟去睇。」
公義價更高
【查錫我 大律師】
「佔中嘅力量未必夠，政府可以拖你，你坐兩三個星期、兩三個月都好，政府唔郁都冇辦法，有意見認為唔好打持久戰，要盡快出手，鬥持久我哋未必贏。你問係咪犯法﹖有啲價值，包括公義，係比法律更高，我願意放棄自由、放棄大律師執照，就係為咗下一代有民主。」
預咗要坐監
【余若薇 公民黨主席】
「我覺得參加佔中就要預咗行到最後一步，如果預咗唔會發生先參加，咁決心要重新評估。參加佔中運動，目標係佔中，政改有乜方案只要合乎國際普及而平等就得，如果花太多時間傾方案傾公投，會溝淡佔中嘅道德力量……我戴得呢頂帽，坐監又好，要預咗。」
從生活着手
【劉先生 室內設計及建築業】
「今日討論好有成果，與會者都同意真普選起碼唔應該有不合理篩選機制，而非暴力抗爭就係香港人爭取普選唯一可以做嘅事。我建議市民從生活着手支持佔中，提走中資銀行存款同變賣中資股票宣示不滿，畀錢呢啲機構賺，即係間接供養獨裁政權！」
唔想變星洲
【杜先生 退休人士】
「我喺新加坡工作十幾年，政府不斷利誘我哋入籍，我都唔理，寧願返香港。雖然新加坡經濟好、人人有屋住，但係政府控制晒所有嘢，人民冇自由意志，我唔想香港變成咁。好多朋友都話有份工就算，做乜搞咁多嘢？我用行動話畀佢哋知，爭取民主無分年齡階層。」
【蘋果動新聞】Android App 修正版上架
回應讀者要求，Android App修正版改善記憶體使用情況，以及廣告顯示模式，即刻去Play Store下載啦！↓↓
http://bit.ly/appledailyupdate