金融市場最驚滙市係咁chok，尤其是作為國際提款機嘅港股，面對日圓兌美元波幅擴大、內地拆息係咁升，有乜法子唔跌，上周五跌勢冇明顯擴大已經偷笑。
外圍各項指標腥風血雨，但上周五港股升跌比例約為5：7，已經冇之前咁弱，個股可能有番啲反彈動力，咁博反彈有乜嘢好選擇？論行業基本因素，真係每個行業總有啲缺點，內銀、內房受政策打擊，內地經濟唔掂，內需同樣中招，情況好啲就要數汽車股。
長城汽車（2333）之前升到你唔信，𠵱家又跌唔落，好似好強，但基本因素都有風險。長汽今年頭五個月銷量相當於舊年全年一半，粗略推算全年銷量增幅就接近兩成，由於基數增加，所以增長放緩難免，未來就係考管理層提升經營效率嘅時候，15倍PE仍算合理，但要再升就面對考驗。
中上游汽車股夠穩陣
相比之下，晉佳就寧願吼吉利汽車（175）。吉利好在永遠處於上市汽車股嘅中游偏高位置，睇番比亞迪（1211）、東風集團（489）、廣汽集團（2238）都出現過低潮，唯獨吉利近幾年喺行業之中走勢較為平穩，所以每次汽車股升浪中，吉利雖然未必係升得最勁嗰隻，但絕對唔會跑輸同業平均水平。
摩通最近發表研究報告，將吉利列為首選汽車股，目標價7元。摩通睇好吉利多過長汽同廣汽，原因係佢既好似長汽咁受惠SUV發展，同時又有廣汽嘅復蘇故事。睇嚟吉利未來日子都能夠保持汽車股嘅中上游位置，配合行業缺點較少，股價較硬淨，預計嚟緊大市反彈，吉利會係比較強嘅股份之一。
睇番個圖，吉利今年1月至3月中造咗個頭肩頂，股價4月跌到最低3.50元左右，之後冇再跌穿呢個位，相信已經消化頭肩頂嘅不利訊號，而3.50元亦係舊年11月至今嘅支持位。
要佢反彈大升未必咁易，但range trade達到目標唔難，可睇4.10至4.20元左右，博賺一成，明顯跌穿3.50元就止蝕。
晉佳
本欄逢周一、三及五刊出
【蘋果動新聞】Android App 修正版上架
回應讀者要求，Android App修正版改善記憶體使用情況，以及廣告顯示模式，即刻去Play Store下載啦！↓↓
http://bit.ly/appledailyupdate