無綫劇《情越海岸線》嚟緊就播結局篇，一眾演員黃浩然、朱璇、李詩韻、楊明同劉俐等，噚日到西九龍中心出席宣傳活動，現場公佈上星期平均收視有27點（約173萬觀眾），而最高更加有30點（約193萬觀眾），終於見番3字頭嘅收視。
傳有咗BB嘅陳茵媺同陳展鵬都冇出席，李天翔惟有戴住陳茵媺嘅面具出場，黃浩然即講笑話：「你大隻咗咁多，係咪有咗呀？」楊明玩遊戲時又將沙灘波塞入肚，之後話：「呢個就係抱抱（陳茵媺劇中花名）十個月後嘅樣啦。」黃浩然即時扮晒陳豪上身咁回應話：「有好消息我會公佈㗎啦。」
朱璇否認掂到小小鵬
今次被外界讚揚有突破嘅朱璇話真係好開心，至於日前有指佢拍劇時掂到陳展鵬重要部位，朱璇強調掂唔到：「因為當時對方都冇投訴，所以我相信冇咁嘅事。」而李詩韻話星期五會請同劇演員食飯兼睇結局，但問到陳茵媺係咪有喜事時，佢就只係話：「等佢自己講啦，希望係喜事。」另外有份拍呢套劇嘅謝雪心，噚日喺尖沙嘴出席活動時，問到有冇收到風陳茵媺係咪有喜，佢就笑晒口話：「等佢公佈，總之開心事啦。」擺明有弦外之音喎。
版主：陳基征
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！