韓國組合神話前晚在亞博館舉行首次香港演唱會，六名成員勁歌熱舞大晒麒麟臂，更在台上爆發水戰，成員互相潑水外，更向台下觀眾埋手，令歌迷high足兩個半小時。
拎貓紙講廣東話
出道15年的神話前晚選擇香港作為亞洲巡迴騷首站，他們在歌迷揮動橙色珍寶珠形狀的螢光棒下，一口氣唱出《Only One》、《This Love》等逾20首新舊歌曲，韓國女星皇甫也專程現身捧場。
成員Dong Wan出動貓紙講廣東話冧港迷：「你哋嘅心，我哋嘅心都一樣，加油！」後來加多句：「你哋好靚呀！」逗得全場尖叫。有歌迷掟卡通背囊仔上台，身形大隻的他試圖孭上身但失敗，十分搞笑。
神話演唱《Usha Usha》時，有歌迷竟掟辣椒上台幾乎掟中Min Woo，Min Woo一臉嚴肅地說：「太危險了，很易滑倒，以後不要這樣做。」
Hye Sung起飛腳
喉嚨有點不適的Hye Sung就不怕膝蓋舊患復發，兩度起飛腳作狀踢隊友，其間又唱甩嘴。
前晚入座率有七成，音響又一度有問題，但神話依然情緒高漲教歌迷跳舞，尾聲時更玩到癲在台上開戰，互相潑水又潑歌迷，可憐的Andy頭髮濕透。神話又將帽子、抹過的毛巾和T恤掟落台，隊長Eric說：「你們是最棒的歌手的粉絲，我們在韓國得到很多流行榜的第一位，謝謝大家。」
採訪、攝影：梁婉霞、仇志德
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！