光大銀行凶兆再現？！光銀自2011至今年初三度打晒鑼鼓話來港上市，股市每次都即刻跌到七個一皮，光銀於是上極都上唔到市。聽聞，光銀兩、三個星期前已經向聯交所遞表，爭取七月上市，恒指過去三周咪由兩萬三，係咁跌落兩萬一囉，真係邪到冇朋友。
光銀最早喺2011年初宣佈來港上市，點知冇耐歐豬病發，希臘爆出違約危機，光銀同年年中打退堂鼓，其間中港股市齊齊下跌6%。舊年中，光銀見個市唔錯，立即捲土重來，但A股又話缺水，兩個幾月怒插一成，光銀再擱置上市大計。到今年三月，光銀出通告話要再搞上市，兩地股市又跌。
港股最近飽受五窮六絕魔咒困擾，光銀又嚟料，佢入表咁耐，港股就跌咁耐，雖則上周五美股造好，但內地多項數據欠佳，港股係咪有得升呢？光銀嘅威力似乎勁過秋官𠻹呀。
【蘋果動新聞】Android App 修正版上架
回應讀者要求，Android App修正版改善記憶體使用情況，以及廣告顯示模式，即刻去Play Store下載啦！↓↓
http://bit.ly/appledailyupdate