賭王愛女何超瓊旗下信德（242）上周宣佈，投資逾5億元落捷星香港，跟東航（670）同澳洲航空合資在港搞廉航，航空業人士莫不嘖嘖稱奇。
先唔講有冇錢賺，攞唔攞到牌，據聞本港機場好快飽和，飛機升降時段僧多粥少，捷星香港他日即使攞到牌，都唔知分到幾多升降時段去飛，班次唔夠密，好難同其他航空公司爭。
航班升降量超預期
廉航主要靠班次密、賣多啲機票去經營，攞唔攞到足夠嘅飛機升降時段去飛，係關鍵之一。機場舊年航班升降量達到35.2萬架次，機管局原先估計2015年先至有呢個數。
消息人士透露，按趨勢，機場將會好快飽和，飛機升降時段隨時唔夠咁多間航空公司分。國泰（293）、港龍家陣可以為擴充網絡繼續申請飛機升降時段，新來者遲啲要爭都唔係咁易。
信德早喺2006、07年，試過同國航（753）旗下澳門航空合資，喺澳門搞廉航，後來不了了之。唔通何超瓊真係咁堅持，一定要做齊海陸空生意？
【蘋果動新聞】Android App 修正版上架
回應讀者要求，Android App修正版改善記憶體使用情況，以及廣告顯示模式，即刻去Play Store下載啦！↓↓
http://bit.ly/appledailyupdate