英超利物浦領隊羅渣士，06年開始帶隊生涯到𠵱家面對傳媒無數次，有咩問題未聽過。不過，日前紅軍官方電視台安排咗個9歲小球迷，同羅帥做個1 on 1訪問；一向自信嘅羅渣士，都有口窒窒嘅時候。
坦言阿蘇最曳
唔好以為小朋友問問題唔刁鑽，有時聽到都幾難答。呢位叫Finn嘅9歲利迷，一開始仲話會就住羅渣士嚟問，點知第一條就問最鍾意邊個球員？呢個問題畀着係球迷一啲都唔難答，但係領隊就大鑊，因為是但講個名都有可能俾人話自己偏心。羅渣士諗一諗就好大體咁話：「我要鍾意晒佢哋所有人！因為佢哋全部都係好好嘅球員，所以我嘅工作係點令到球員踢得更好。」之後被問到邊個喺球隊入面最曳？羅帥連諗都冇諗就話係蘇亞雷斯。雖然阿蘇今年紀律麻麻，咬人事件仲搞到自己被罰停賽10場，但係領隊大人都唔使咁直接呀嘛。
Finn問頭幾條問題都好正路，但係突然異想天開，話自己一星期有5鎊（約60港元）零用錢，問羅渣士如果每星期畀5鎊佢，紅軍領隊會點用。羅帥一時刻完全冇頭緒，諗唔到點答好，最後只可以同Finn講自己會儲起個5鎊。最後小朋友好真誠咁問羅渣士，有冇辦法可以留住掛靴嘅加歷查。羅渣士亦好誠懇咁回答：「加歷查為利物浦奉獻咗一切，今年對佢嘅人生嚟講好似係時候要改變方向。所以，無論我講咩都好，都好難令佢回心轉意。」
【蘋果動新聞】Android App 修正版上架
回應讀者要求，Android App修正版改善記憶體使用情況，以及廣告顯示模式，即刻去Play Store下載啦！↓↓
http://bit.ly/appledailyupdate