近日張家輝一幅朱古力爆裂肌肉照，掀起全城哄動：有女士驚呼；有懷疑論者質疑係假相；有肥佬阿Bob的惡搞圖，再有不同人士自行將頭像移花接木到阿Bob身軀的「二次惡搞」，瘋傳於facebook上，熱潮就此形成。
其實上述所講，都很表面。記得在WhatsApp收到張家輝大隻佬照當日，chat group內眾人一輪「是真是假？」、「好型定好驚」的爭論後，晚上group內男士A便說：「剛剛的起心肝，去咗做gym！」男士B接：「我都落咗街跑步！」男士C：「係咩？我都去游咗10個塘！」而小弟，其實亦在家做了70下sit up同50下掌上壓……這段話才真正反映張家輝這幅相，對男士影響力有幾大，相信部份人更開始定下人生新目標──要影番幅咁嘅相！
許下這激昂願望，何其容易；而真正可付諸實行的，又有幾多？訪問中，張家輝說鍛煉過程天天吃白烚雞肉魚肉、中段要日吃30隻蛋白增加蛋白質，拍攝前要脫水令肌肉線條突出，飲太少水導致小便變成啡色……，這些飲食控制已是聽到都驚，還未計每天於健身房內所流的汗水，不得不佩服張家輝的驚人意志和毅力。而他這部新戲，怎可不入場睇睇？
我目標卑微好多，像很多男士一樣希望操fit啲啲先迎接夏日走到沙灘。張家輝這照片是及時雨，望兩望，又迫自己做多幾下掌上壓。未知上文提及的男士A、B、C，只是霎時衝動，還是可堅持操fit下去？
方柏翹
now足球評述員
【蘋果動新聞】Android App 修正版上架
回應讀者要求，Android App修正版改善記憶體使用情況，以及廣告顯示模式，即刻去Play Store下載啦！↓↓
http://bit.ly/appledailyupdate