【銅鑼灣開平道】沈卓盈（沈大師）同楊秀惠有米舊愛麥偉汶熱戀，拍拖短短7個月已經談婚論嫁，前晚7點幾沈大師仲見男友家長，齊齊去銅鑼灣意大利餐廳da Domenico食飯，以為沈大師會隆重其事化行妝，點知佢竟然夠膽素顏上陣，以最真一面見家長。
平日化晒妝嘅沈大師索爆，但前晚沈大師冇化妝個樣原來幾嚇人，黑眼圈、大口同扁鼻乜都齊，條脷仲有啲黑色，好在佢飲咗酒面泛少少桃紅，遮掩咗佢面黃嘅膚色咋！前晚佢同男友家人食飯飲酒，沈大師不停露出笑容㖭。
拖手離開
佢哋食到9點幾，沈大師同男友先行離去，問係咪見家長？沈大師笑咪咪話：「食飯咋。」記者叫佢哋行埋啲影相，男友怕醜話：「我係圈外人唔使啦。」仲好有禮貌對記者彎腰鞠躬，之後兩人拖手離去。男友父母離開時怕影相，伯母好驚用紙袋遮面，問囝囝幾時結婚？世伯冇出聲走咗。噚日沈大師到灣仔出席婚紗展，問前晚係咪見男友家長？佢話：「普通見面食飯，唔係傾婚事，大家相處得好開心，男友媽咪冇催婚。」問男友有冇講結婚？沈大師嬌嗲話：「要問佢噃，每次拍拖都視為結婚對象，希望有結果。」
採訪、攝影：彭琮然、梁繼光、羅德光
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！