由Spike TV舉辦嘅第七屆猛男之選頒獎禮，噚日喺加州舉行，大會唔知係咪食住新片《醉爆伴郎團3》個勢，竟然搵咗隻BB長頸鹿嚟做頒獎嘉賓。打咗煲呔嘅長頸鹿仔好生猛，當美國男星積遜蘇迪堅斯（Jason Sudeikis）宣佈得獎者嗰陣，BB長頸鹿突襲積遜，用頭頂佢個肚，好在只係輕輕力。至於成龍頒獎畀麥克華堡（Mark Wahlberg）嗰陣，兩個人即席喺台上切磋功夫。
積嘉倫賀（Jake Gyllenhaal）頒獎畀金像影帝謝夫布烈治（Jeff Bridges）嗰陣戴假髮同黑超，扮謝夫喺電影《大保齡離奇綁架》嘅造型，不過謝夫似乎唔多鍾意長頸鹿，竟然同隻鹿互睥。至於唔使扮鬼扮馬嘅謝茜嘉艾芭（Jessica Alba）就坐戰機出場，仲有King Kong同兩位深山美人做背景。後台都好精采，因為帶咗新歡到場嘅畢列谷巴（Bradley Cooper）撞到舊愛珍妮花雅麗絲頓（Jennifer Aniston），畢列唔驚新歡呷醋，同珍妮花密密斟！
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！