幼獅？睇怕用冇牙病貓嚟形容呢班英格蘭U21國家隊貼切啲。英格蘭喺上周六U21歐國盃A組第2輪分組賽賽事，對住挪威U21有3大猛將復出，以為實食冇黐牙，點知輸得比第1場更難睇，以1:3慘敗，英格蘭兩戰全敗成為今屆賽事首支出局嘅球隊，認真羞家。
主力復出照輸
英格蘭U21喺今屆賽事前都受到一定程度睇好，至少都係A組出線次熱門，估唔到分組賽未踢晒就玩完。首戰以0:1僅負畀意大利之後，英格蘭喺上周六對住挪威，有下季轉投曼聯嘅韋費特沙夏，同埋湯馬士恩斯以及丹尼路斯3位主力復任正選，照計贏面更高。點知未開波已經唔老利，賽會播出嘅歌曲歌詞有種族歧視成份，搞到會場相當尷尬。
開賽15分鐘，挪威由費特歷貝治先開紀錄，加上祖貝格同埋伊克林喺上、下半場各入一粒，英格蘭踢到52分鐘就已經落後0:3。之後英軍由奇治戴臣射入12碼破蛋，都要輸1:3完場。同組嘅意大利U21就繼續強勢以4:0大勝東道主以色列，兩戰全勝提早出線4強；經過兩輪比賽之後挪威同以色列，數字上仲有出線機會，捧蛋嘅英軍就可以訂定機票返屋企喇。
離隊賠率熱至1.5倍
英格蘭領隊皮亞斯賽後話：「我哋提前出局，除咗抵死之外都冇乜好講。大部份球員都發揮唔到應有水準，今場波啲防守簡直慘不忍睹。」皮亞斯同足總合約到6月尾就完結，小英出局後，英國博彩公司Skybet將佢離隊嘅賠率升溫到1.5賠，續約就有2.5倍。但我求大俠認為，呢班英格蘭大部份球員都冇英超比賽經驗，技不如人都係意料中事。
【蘋果動新聞】Android App 修正版上架
回應讀者要求，Android App修正版改善記憶體使用情況，以及廣告顯示模式，即刻去Play Store下載啦！↓↓
http://bit.ly/appledailyupdate