大熱天時，氣溫高達攝氏33度，女仔寧願逛商場、嘆冷氣；兩個80後──紋身Cat（吳天麗）同42吋長腿Mei（黃婉媚）偏愛熱，着住比堅尼在無遮無掩的舊咖啡灣沙排場與沙共舞，大騷古銅色肌膚及完美體態，這都歸功於沙灘排球。記者：徐嘉華 攝影：王子俊 服裝提供：Pull-in、TEVA
保險、護士玩沙排
平時在冷氣房工作的Cat（25歲）同Mei（24歲），正職是保險經紀及診所護士，但廿多歲的陽光笑面，要換了比堅尼、踏上沙排場上才見到，無論是拿水桶幫沙降溫，還是瞓沙救波，混身汗水滴不停，但二人卻樂在其中。
呃到人 身體好
記：熱辣辣，沙排有咩好玩？
Cat：其實沙排好似玩大話骰，我好enjoy呢part。以前讀中學，我係女足同手球校隊，都係守龍，嗰時都要估對方射去邊，但沙排仲好玩，我最擅長玩人，最鍾意對方估錯我，好似我扮打直線，你唔信，覺得我呃你，你咪去斜線囉，但其實我真係打直線，這種玩人的感覺好high。
Mei：我係被「星探」拉去打沙排嘅，講笑啫，其實係有次同朋友落沙灘，有個沙排教練問我有冇興趣打；我見一班人烈日下打沙排，心諗都係好健康嘅運動，於是開始打，我以前好易發燒，但打沙排後身體真係好咗。其實好多年輕人都鍾意落沙灘玩或曬太陽，沙排一舉兩得。
比堅尼 冇走光
記：着比堅尼怕唔怕走光？介唔介意有人用有色眼鏡睇你哋？
Mei：我開頭只着短衫短褲，但發覺曬到兩隻色，於是改着top同短褲仔，發現背脊好大個印，最後都係要着比堅尼；初初都唔慣，成日驚走光，但我𠵱家可以話你知係唔會甩嘅，只要綁得好同買比堅尼時親身試着，最好係我呢種掛頸式就最安全。
Cat：啱啱都見到有個路過阿伯影我哋，其實着得比堅尼落沙灘就預咗有人睇，嚟得呢種公眾場所，就唔會太介意；着比堅尼另一好處，就係push自己keep fit，大大個肚腩着都唔好睇啦。
古銅色 排毒素
記：曬成咁，唔怕黑？
Cat：我覺得古銅色幾靚呀，好多人鍾意落沙灘曬太陽，但曬得唔均勻，沙排最好，不停跳，全身每個位都曬到。
Mei：平時喺診所工作不見天日，所以特別鍾意喺海闊天空下打波，出汗多，又易令身體毒素排出，一邊keep fit一邊提升身體質素，何樂而不為？
後記
沙排，對Cat同Mei來說，不是玩玩吓，是夢。兩人夾了3年，為8月全運會，將原本全職的工作改為兼職，賺少了，但換來圓夢機會：「我們好想得到大家認同（難忘成績是2011年越南亞洲邀請賽第7），全運是試金石，最想參加明年仁川亞運。」
【蘋果動新聞】Android App 修正版上架
回應讀者要求，Android App修正版改善記憶體使用情況，以及廣告顯示模式，即刻去Play Store下載啦！↓↓
http://bit.ly/appledailyupdate