在香港考中學文憑試，中國歷史唔係必修科，又因學生多數報考六至七科，除咗中英數通識四科必修之外，揀多兩至三科，點會揀到中史呀，故此在中學教中史嘅老師，無不叫苦，長此以往，根本無學生可教，你估校長會唔會炒中史老師魷魚呢？或者叫佢走去教通識科呢，無論點樣，在大學主修中國歷史嘅學生，以往多數畢業後到中學教歷史，依家冇呢支歌唱咯，不如在校時狂谷英文，報考AO、EO好過，過往好多高官係出身港大歷史系㗎嘛。不過聽講現時在港大主修歷史之學生，與年俱降，歷史科教授人數亦少，故此出身港大歷史系之AO（如俞宗怡，已退休）將會係「瀕危動物」。
除咗中史老師飯碗難保之外，專門出版中國文學及中國歷史之教科書出版商亦行將絕種。一位書商睇見2013年報考文憑試之中史學生，只有七千四百幾人，不禁長嘆一聲，「最後一屆中學會考（2010），我記得考中史學生有二萬八千人，去年文憑試考中史得番零頭，八千幾人，今年仲慘，人數再跌嘅話，試問我啲中國歷史教科書搵邊個買，印刷成本都收唔返！再者，中國文學呢科已成為大冷門科目，得二千幾人報考，生物、物理、化學呢啲熱門科目多數只係三揀二，學生唔會三科讀齊，於是每科考生亦由以前會考時嘅三萬零，跌咗百分之五十。總之，出版教科書，只能集中在中國語文、英文、數學、通識四科拼個你死我活，否則難以生存！」
香港係中國人聚居地方，學生不懂中國歷史，不懂中國文學，讀中國語文好似讀英國語文咁樣分析句子，唔怪得陶傑在電視鏡頭面前話香港下一代中文程度拙劣（平均計）。讀中文不識中國古文、讀英文不讀英詩與莎士比亞，即係只識工具而無內涵靈魂，好難講話有文化，仲講乜鬼國民教育吖。幾個月前左丁山遇到一位成功人士（香港標準：有生意，有豪宅，有幾十個夥計），係典型美國MBA醒目仔，回港將爸爸檔小生意發展得幾好，偶然問佢鍾意讀乜嘢，佢話：「以前一定係讀美國暢銷商業秘笈書，但近年返大陸傾生意傾得多，唔讀吓中文書唔得，一讀就對中國歷史着迷，唔識中史，好難同內地人傾生意或者了解國情，甚至唔知道毛澤東與鄧小平嘅事，根本唔明白佢地嘅行為準則㖭！我依家要個仔讀中國歷史故事，希望佢早啲對中史產生興趣！」